કોલકાતા : પશ્ચિમ બંગાળમાં ચૂંટણીના માહોલ વચ્ચે એક પછી એક મોટા રાજકીય નાટકો સામે આવી રહ્યા છે, જેમાં નંદીગ્રામના કોંગ્રેસ ઉમેદવાર મિલન પ્રધાનની ધરપકડ બાદ હવે પોલીસે રાજનગર મતવિસ્તારમાંથી ચૂંટણી લડી રહેલા ઉમેદવાર સૈફુલ ઇસ્લામની તેમના નિવાસસ્થાનેથી ધરપકડ કરી છે. વર્ષ ૨૦૨૧ની વિધાનસભા ચૂંટણી દરમિયાન બે જૂથો વચ્ચે થયેલી અથડામણના પાંચ વર્ષ જૂના કેસમાં આ કડક કાર્યવાહી કરવામાં આવી છે, જેના કારણે રાજકીય વર્તુળોમાં ભારે ચકચાર મચી ગઈ છે.

ધરપકડ કરાયેલા સૈફુલ ઇસ્લામ હુમાયુ કબીરની પાર્ટી 'આમ જનતા ઉન્નય પાર્ટી' (AJUP) સાથે સંકળાયેલા છે, જ્યારે આ અગાઉ જમીન સંપાદન વિરોધી આંદોલનના બે દાયકા જૂના કેસમાં કોંગ્રેસના ઉમેદવારની પણ ધરપકડ થઈ ચૂકી છે. આ તમામ રાજકીય ઉથલપાથલ વચ્ચે AJUP દ્વારા રેજીનગર પેટાચૂંટણી માટે હુમાયુ કબીરના પુત્ર ગુલામ નબી આઝાદને મેદાને ઉતારવામાં આવ્યા છે, અને બહેરામપુર પોલીસે કથિત તણાવ ભડકાવવાના કાવતરા બદલ હુમાયુ કબીરને પણ નોટિસ ફટકારી સોમવારે હાજર રહેવા આદેશ કર્યો છે.

આ મામલો વધુ ગંભીર ત્યારે બન્યો જ્યારે હુમાયુ કબીરની પાર્ટીના રાજ્ય સચિવ આશિક ઇકબાલની મુર્શિદાબાદ જિલ્લામાં વાહન તપાસ દરમિયાન ધરપકડ કરવામાં આવી, જ્યાંથી પોલીસને મોટી માત્રામાં એટલે કે ૫૦૦ રૂપિયાની ૧૦૮ નકલી નોટો, બે ગેરકાયદેસર હથિયારો અને ચાર કારતૂસ મળી આવ્યા હતા. આ ઉપરાંત, શનિવારે રાજનગર મતવિસ્તારમાં તે સમયે નાટક સર્જાયું જ્યારે મમતા બેનર્જીના ઉમેદવાર રબીઉલ આલમ ચૌધરીએ પહેલા ઉમેદવારી પાછી ખેંચી રાજીનામું આપવાની જાહેરાત કરી, પરંતુ બાદમાં પક્ષના વડા દ્વારા મનાવી લેવાતા તેમણે ચૂંટણી લડવાનું યથાવત રાખ્યું હતું.

આવનારી ચૂંટણીઓમાં ટિકિટ વિવાદ, ઉમેદવારોની ધરપકડ અને હથિયારો તથા નકલી ચલણ ઝડપાવાની ઘટનાઓએ કાયદો અને વ્યવસ્થા સામે ગંભીર સવાલો ખડા કર્યા છે, ત્યારે પોલીસ આ કેસમાં સંડોવાયેલા અન્ય શખ્સો સુધી પહોંચવા માટે સઘન તપાસ ચલાવી રહી છે.