નવી દિલ્હી : મધ્યપ્રદેશના ધાર સ્થિત વિવાદિત ભોજશાળા સંકુલમાં શુક્રવારની નમાઝ માટે ફાળવવામાં આવેલા વૈકલ્પિક સ્થળ અંગેનો વિવાદ હવે સર્વોચ્ચ અદાલતમાં પહોંચ્યો છે. મુસ્લિમ પક્ષે આરોપ લગાવ્યો છે કે મધ્યપ્રદેશ સરકાર કોર્ટના આદેશ છતાં ભોજશાળાની નજીક જગ્યા ફાળવવામાં નિષ્ફળ રહી છે અને અત્યંત દૂર સ્થળ ફાળવવામાં આવ્યું છે. સુપ્રીમ કોર્ટ આ મામલે આગામી ૨૯ જુલાઈએ સુનાવણી હાથ ધરવા સંમતિ દર્શાવી છે.
૧.૩ કિમી દૂર સ્થળ અપાતા બે શુક્રવારની નમાઝ ચૂકી જવાનો દાવો
સુપ્રીમ કોર્ટમાં સુનાવણી દરમિયાન મુસ્લિમ પક્ષ તરફથી હાજર રહેલા વરિષ્ઠ વકીલ હુઝેફા અહમદીએ રજૂઆત કરી હતી કે, "અધિકારીઓ આદેશ મુજબ ભોજશાળાની અડીને કે નજીકમાં જગ્યા ફાળવી રહ્યા નથી. જે સ્થળ ફાળવવામાં આવ્યું છે તે ૧.૩ કિમી દૂર છે, જેના કારણે પ્રદર્શનકારીઓ કે શ્રદ્ધાળુઓ બે શુક્રવારની નમાઝ અદા કરી શક્યા નથી."
આ દલીલ સામે સોલિસિટર જનરલ તુષાર મહેતાએ જણાવ્યું હતું કે ફાળવેલું સ્થળ માત્ર ૯૦૦ મીટર દૂર છે. તેના જવાબમાં કટાક્ષ કરતા અહમદીએ કહ્યું, "અમારી પાસે હેલિકોપ્ટર નથી... રોડ માર્ગે તે ૧.૩ કિમી થાય છે. આ કોર્ટના આદેશોનું પાલન ન કરવાનો સ્પષ્ટ પ્રયાસ છે."
સુપ્રીમ કોર્ટનો વચગાળાનો આદેશ અને ભોજશાળા વિવાદ
ઉલ્લેખનીય છે કે, ૧૪ જુલાઈના રોજ સુપ્રીમ કોર્ટે મધ્યપ્રદેશ સરકારને આદેશ આપ્યો હતો કે કેસનો અંતિમ નિર્ણય ન આવે ત્યાં સુધી મુસ્લિમ સમુદાયના લોકો બપોરે ૧ થી ૩ વાગ્યા દરમિયાન શુક્રવારની નમાઝ અદા કરી શકે તે માટે ભોજશાળા સંકુલની બાજુમાં જ એક અલગ ખુલ્લી જગ્યા ઓળખીને ફાળવવામાં આવે.
આ આદેશ મધ્યપ્રદેશ હાઈકોર્ટના એ ચુકાદા સામેની અપીલ દરમિયાન આપવામાં આવ્યો હતો, જેમાં હાઈકોર્ટે ભોજશાળા સંકુલને દેવી સરસ્વતીને સમર્પિત મંદિર જાહેર કર્યું હતું. ધાર સ્થિત આ ઐતિહાસિક સ્મારક પર હિન્દુ પક્ષ દેવી સરસ્વતીનું મંદિર હોવાનો દાવો કરે છે, જ્યારે મુસ્લિમ પક્ષ તેને 'કમાલ મૌલા મસ્જિદ' ગણાવે છે. હવે ૨૯ જુલાઈની સુનાવણી પર સમગ્ર દેશની નજર રહેશે.