રીગા (લેટવિયા): યુક્રેન અને રશિયા વચ્ચેના યુદ્ધની જ્વાળાઓ હવે બાલ્ટિક દેશો સુધી પહોંચી હોય તેવું લાગી રહ્યું છે. મંગળવારે રશિયાની વિદેશી ગુપ્તચર એજન્સી (SVR) એ લેટવિયા પર એક અત્યંત ગંભીર અને સનસનાટીભર્યો આરોપ મૂકતા આંતરરાષ્ટ્રીય સ્તરે ખળભળાટ મચાવી દીધો છે. રશિયન એજન્સીનો દાવો છે કે લેટવિયાએ યુક્રેનિયન સૈન્યને તેના પ્રદેશનો ઉપયોગ રશિયા પર ડ્રોન હુમલા કરવા માટે 'બેઝ' તરીકે કરવાની મંજૂરી આપી દીધી છે. આ દાવા સાથે જ રશિયાએ લેટવિયાને ગર્ભિત ધમકી પણ આપી છે કે મોસ્કોને તેના 'નિર્ણય કેન્દ્રો' (decision-making centres) ના સ્થાનો ખબર છે.

SVR એ એવો પણ આરોપ લગાવ્યો છે કે યુક્રેનિયન ડ્રોન યુનિટના કર્મચારીઓ પહેલેથી જ લેટવિયાના પાંચ અલગ-અલગ લશ્કરી થાણાઓ પર તૈનાત થઈ ગયા છે. રશિયાએ આ આકરા શબ્દોમાં કહ્યું છે કે, "લેટવિયાના શાસકોમાં આત્મરક્ષાની ભાવના કરતાં 'રુસોફોબિયા' (રશિયા પ્રત્યેની નફરત) વધુ પ્રબળ છે." રશિયાની આ ધમકી અને આરોપને બાલ્ટિક દેશોમાં રશિયાના વધી રહેલા આક્રમક વલણના ભાગરૂપે જોવામાં આવી રહ્યા છે.

લેટવિયાનો સ્પષ્ટ ઈનકાર: "રશિયા ફરીથી જૂઠું બોલી રહ્યું છે"

રશિયાના આ ગંભીર આરોપોને લેટવિયાએ સંપૂર્ણપણે નકારી કાઢ્યા છે. લેટવિયાના વિદેશ પ્રધાન બૈબા બ્રાઝે સોશિયલ મીડિયા પ્લેટફોર્મ 'X' પર આકરા શબ્દોમાં પ્રતિક્રિયા આપતા લખ્યું કે, "રશિયા ફરીથી જૂઠું બોલી રહ્યું છે. લેટવિયા કોઈ પણ સંજોગોમાં રશિયા પર હુમલો કરવા માટે પોતાનું હવાઈ ક્ષેત્ર કે જમીન પૂરી પાડતું નથી. આ બાબત રશિયન પ્રતિનિધિઓને અનેકવાર સ્પષ્ટ કરવામાં આવી છે." લેટવિયાએ આને રશિયાની એક સુનિયોજિત 'ખોટી માહિતી' (Disinformation) ઝુંબેશ ગણાવી છે.

વધતી જતી અસુરક્ષા: બાલ્ટિક દેશોમાં ડ્રોન ક્રેશની ઘટનાઓ

૨૦૨૨માં રશિયા-યુક્રેન યુદ્ધ શરૂ થયા બાદથી લેટવિયા, લિથુઆનિયા અને એસ્ટોનિયા જેવા દેશોમાં અવારનવાર રશિયન અને યુક્રેનિયન ડ્રોન ક્રેશ થવાની ઘટનાઓ બની છે. માર્ચ અને મે મહિનાની શરૂઆતમાં લેટવિયામાં બનેલી આવી ડ્રોન દુર્ઘટનાઓમાં કોઈ જાનહાનિ તો નથી થઈ, પરંતુ તેણે બાલ્ટિક ક્ષેત્રની સુરક્ષા વ્યવસ્થા સામે પ્રશ્નો જરૂર ઊભા કર્યા છે.

નાટો (NATO) સભ્ય હોવા છતાં, બાલ્ટિક દેશો માટે રશિયા તરફથી આવતા આવા આરોપો એક ચિંતાનો વિષય છે. રશિયા દ્વારા કરવામાં આવતી આવી ટિપ્પણીઓને વિશ્લેષકો યુદ્ધને લેટવિયા અને અન્ય પાડોશી દેશો સુધી વિસ્તારવાના કે તેમને ડરાવવાના પ્રયાસ તરીકે જોઈ રહ્યા છે. આ ઘટનાક્રમ દર્શાવે છે કે આવનારા દિવસોમાં બાલ્ટિક ક્ષેત્રમાં તણાવમાં હજુ વધારો થઈ શકે છે.