ઢાકા : બાંગ્લાદેશની રાજધાની ઢાકામાં વારંવાર હિંસાના બનાવો બનતા તણાવ ચરમસીમાએ પહોંચ્યો છે. વિદ્યાર્થી સંગઠનો દ્વારા રાષ્ટ્રવ્યાપી હડતાળ વચ્ચે, મંગળવાર, ૧૦ નવેમ્બરના રોજ અશાંતિ ચાલુ રહી હતી અને લઘુત્તમ વેતન વધારાની માંગણી સાથે વિરોધ પ્રદર્શનો પણ ફરી શરૂ થયા હતા. અશાંતિ દરમિયાન પોલીસ સાથેની અથડામણમાં બે ગાર્મેન્ટ કામદારો ઘાયલ થયા હતા, જેથી પરિસ્થિતિને નિયંત્રણમાં લાવવા અધિકારીઓએ ઔદ્યોગિક વિસ્તારોમાં વધારાના સુરક્ષા દળો તૈનાત કર્યા છે. અગાઉ ૮ નવેમ્બરે શહેરના ૧૦ મુખ્ય વિસ્તારોમાં ૧૫ થી ૨૦ વિસ્ફોટો અને આગચંપીની ઘટનાઓ નોંધાઈ હતી, જેમાં ઇમ્પ્રુવાઇઝ્ડ વિસ્ફોટક ઉપકરણો ફેંકવા અને વાહનો સળગાવવાનો સમાવેશ થાય છે.

ઘણા દિવસોના વિરામ પછી ફરી શરૂ થયેલા આ પ્રદર્શનો દરમિયાન ઔદ્યોગિક વિસ્તારોના કામદારોએ સવારની પાળીમાં હાજર થઈને કામ કરવાનો ઇનકાર કરી દીધો હતો. ઢાકાથી ૧૭ કિમી દૂર આશુલિયા ઔદ્યોગિક વિસ્તારમાં કામદારોએ બૈપાલ-અબ્દુલ્લાહપુર રસ્તો બ્લોક કર્યો હતો અને રસ્તો ખુલ્લો કરાવવા ગયેલી પોલીસ પર ઇંટો-પથ્થરો ફેંક્યા હતા. પરિસ્થિતિ વણસતાં પોલીસે ટીયર ગેસ અને સાઉન્ડ ગ્રેનેડ છોડ્યા હતા, જેમાં બે કામદારો ઈજાગ્રસ્ત થયા હતા. બીજી તરફ, પ્રતિબંધિત વિદ્યાર્થી સંગઠન બાંગ્લાદેશ છાત્ર લીગ (BCL) ના પ્રમુખ સદ્દામ હુસૈન અને મહાસચિવ શેખ વાલી આસિફ ઇનાને ૧૦ નવેમ્બરે દેશવ્યાપી હડતાળની હાકલ કરી શૈક્ષણિક સંસ્થાઓ, કચેરીઓ અને વાહનવ્યવહાર બંધ રાખવા અપીલ કરી છે.

હિંસાની આ લહેરનું મુખ્ય કેન્દ્ર પ્રતિષ્ઠિત ઢાકા યુનિવર્સિટી કેમ્પસ બન્યું હતું, જ્યાં એક જ રાતમાં યુનિવર્સિટીના મુખ્ય દરવાજા, સેનેટ બિલ્ડિંગ, આધુનિક ભાષાઓ સંસ્થા, મેટ્રો સ્ટેશન નજીક TSC અને સુફિયા કમાલ હોલ બહાર નીલખેત સ્ક્વેર જેવા છ સ્થળોએ IED વિસ્ફોટ થયા હતા, જે બાદ પોલીસે ત્રણ શંકાસ્પદોની ધરપકડ કરી છે. ડીસીપી અખ્તર હુસૈનના જણાવ્યા મુજબ, પ્રારંભિક તપાસમાં બહારના લોકોને પૈસાની લાલચ આપીને આવામી લીગ અને સંલગ્ન જૂથો દ્વારા હુમલા કરાવાયા હોવાની શંકા છે, જોકે આવામી લીગે આ આરોપો ફગાવ્યા છે. આ સિવાય, ભારતમાં રહેલા પૂર્વ વડાપ્રધાન શેખ હસીનાના વકીલોએ નવા પાસપોર્ટ અને NID માટે અરજી કરી હોવાથી તેમના ડિસેમ્બરમાં વતન પરત ફરવાની શક્યતાએ રાજકીય વાતાવરણ વધુ ગરમ કર્યું છે.