મુંબઈ : મુંબઈની જીવાદોરી ગણાતી લોકલ ટ્રેનમાં સુરક્ષાની સ્થિતિ અત્યંત ગંભીર બની છે. ચર્ચગેટ-નાલાસોપારા લોકલ હત્યાકાંડના આઘાતમાંથી મુંબઈ હજુ બહાર આવ્યું નથી ત્યાં જ ૨૫ જૂનની રાત્રે માહીમ સ્ટેશન પર ૩૫ વર્ષના નવીન પ્રસન્ન નામના યુવક પર એક અજાણ્યા શખ્સે ચપ્પુ વડે ઘાતકી હુમલો કર્યો છે. સામાન્ય બાબતે થયેલા વિવાદમાં પીછો કરીને હુમલો કરવામાં આવતા નવીન ગંભીર રીતે ઘાયલ થયો છે, જેને સારવાર અર્થે સાયન હોસ્પિટલમાં દાખલ કરવામાં આવ્યો છે.

ઘટનાક્રમ મુજબ, કામ પરથી પરત ફરી રહેલા નવીનનો અકસ્માતે એક શખ્સ સાથે ધક્કામુક્કી થતા મોબાઈલ નીચે પડ્યો હતો. નવીને તત્કાલ માફી માંગી હોવા છતાં, ઉશ્કેરાયેલા હુમલાખોરે સેનાપતિ બાપટ માર્ગ સુધી પીછો કરીને લોહીલુહાણ કરી નાખ્યો હતો. આ પૂર્વે ૨૪ જૂને ટ્રેનમાં દરવાજો બંધ રાખવાની નજીવી બાબતે મયંક લોહાર નામના યુવકની હત્યા કરવામાં આવી હતી, જેનો મુખ્ય આરોપી રોશન સુવર્ણ હાલ પોલીસ કસ્ટડીમાં છે.

આ ભયાનક ઘટનાઓને પગલે રેલવે તંત્ર હરકતમાં આવ્યું છે. સુરક્ષામાં રહેલી ખામીઓને સુધારવા માટે વહીવટી તંત્ર દ્વારા વરિષ્ઠ અધિકારીઓની સામૂહિક બદલીઓ કરવામાં આવી છે, જેમાં બોરીવલી GRP ના વરિષ્ઠ નિરીક્ષક દત્તાત્રેય ખોપિલકરના સ્થાને પંઢરીનાથ કાંદેની નિયુક્તિનો સમાવેશ થાય છે. સેન્ટ્રલ, વેસ્ટર્ન અને હાર્બર લાઇનના અનેક જવાબદાર અધિકારીઓને બદલીને સુરક્ષા વ્યવસ્થાને વધુ કડક બનાવવાના પ્રયાસો હાથ ધરવામાં આવ્યા છે.

હાલ પોલીસ ફરાર આરોપીની શોધખોળ કરી રહી છે. મુસાફરોની સુરક્ષા સુનિશ્ચિત કરવા માટે પોલીસ દ્વારા સ્ટેશનો અને ટ્રેનોમાં પેટ્રોલિંગ વધારવામાં આવ્યું છે. આ ઘટનાઓ બાદ રેલવે વહીવટીતંત્ર કાયદો અને વ્યવસ્થા જાળવી રાખવા માટે કડક સુરક્ષા પ્રોટોકોલ લાગુ કરવાની તૈયારી કરી રહ્યું છે, જેથી ભવિષ્યમાં મુસાફરો નિર્ભય બનીને મુસાફરી કરી શકે.