ઉખરુલ,તા.૨૫: શુક્રવારે મણિપુરના ઉખરુલ જિલ્લામાં ફરી હિસા ફાટી નીકળી. બે અલગ અલગ ગોળીબારની ઘટનાઓમાં ઓછામાં ઓછા ત્રણ લોકો માર્યા ગયા, જેનાથી રાજ્યમાં તણાવ વધુ વધ્યો. મણિપુર પહેલાથી જ મેઇતેઈ અને કુકી સમુદાયો વચ્ચે વંશીય સંઘર્ષનો સામનો કરી રહ્યું છે. હવે, ઉખરુલમાં નાગા અને કુકી સમુદાયો વચ્ચે હિસાના અહેવાલો સામે આવી રહ્યા છે.

પોલીસના જણાવ્યા અનુસાર, શુક્રવારે વહેલી સવારે ઉખરુલ જિલ્લાના સિનાકેઇથેઈ ગામ નજીક તંગખુલ નાગા અને કુકી સમુદાયોના સશસ્ત્ર્ જૂથો વચ્ચે ભારે ગોળીબાર થયો. આ હિસક અથડામણે જિલ્લાના શાંતિપૂર્ણ વાતાવરણને સંપૂર્ણપણે ખોરવી નાખ્યું છે.

આ અથડામણમાં કામજોંગ જિલ્લાના ચાટ્રિક ખુલેન ગામના રહેવાસી ૨૯ વર્ષીય તાંગખુલ યુવક હોર્શોકમી જામંગનું મોત થયું હતું. સ્થાનિક સૂત્રોના જણાવ્યા અનુસાર, ગોળીબારમાં ત્રણ નાગરિકો પણ ઘાયલ થયા હતા અને તેમને સારવાર માટે હોસ્પિટલમાં લઈ જવામાં આવ્યા હતા.

નાગા સંગઠન તાંગખુલ નાગા લોંગ (TNL) એ આરોપ લગાવ્યો છે કે SoO (ઓપરેશન સસ્પેન્શન) હેઠળ કુકી આતંકવાદીઓની પ્રવૃત્તિઓએ વિસ્તારમાં અશાંતિ ફેલાવી છે. સંગઠનનો દાવો છે કે કુકી આતંકવાદીઓએ નાગા ગ્રામ રક્ષકો પર હુમલો કર્યો હતો જ્યારે તેઓ પેટ્રોલિગ પર હતા.

પહેલી ઘટનાના થોડા સમય પછી, નજીકના મુલ્લામ ગામમાં, કુકી પ્રભુત્વ ધરાવતા ગામમાં ફરી એક ગોળીબાર થયો. અથડામણમાં માર્યા ગયેલા બે લોકોની ઓળખ લેતલલ સીતાલ્હો (જેમ્સ કુકી) અને પાઓમિનલુન હાઓલાઓ (હિતેલાલ કુકી) તરીકે થઈ છે. બંને કાંગપોકપી જિલ્લાના રહેવાસી હતા.

મુલ્લામ વિલેજ ઓથોરિટીએ આરોપ લગાવ્યો છે કે શુક્રવારે સવારે ૫:૩૦ વાગ્યે તંગખુલ આતંકવાદીઓએ તેમના ગામ પર હુમલો કર્યો હતો. કુકી ઓર્ગેનાઇઝેશન ફોર હ્યુમન રાઇટ્સ ટ્રસ્ટે આ હત્યાઓની સખત નિદા કરી છે અને દાવો કર્યો છે કે મુલ્લામ અને સોંગફાલ ગામોમાં ઘરો પણ બાળી નાખવામાં આવ્યા હતા.

ઉખરુલ જિલ્લો મુખ્યત્વે તંગખુલ નાગા પ્રભુત્વ ધરાવતો વિસ્તાર છે. ફેબ્રુઆરી ૨૦૨૬ થી તંગખુલ અને કુકી સમુદાયો વચ્ચે તણાવ સતત વધી રહ્યો છે. ગયા અઠવાડિયે, ઉખરુલમાં આતંકવાદી હુમલામાં બે તંગખુલ પુરુષો માર્યા ગયા હતા. તે જ દિવસે સિનાકેઇથેઈમાં પણ ગોળીબારની ઘટના બની હતી.

તણાવને ધ્યાનમાં રાખીને વિસ્તારમાં વધારાના સુરક્ષા દળો તૈનાત કરવામાં આવ્યા છે. પોલીસ અને જિલ્લા વહીવટીતંત્ર પરિસ્થિતિને કાબૂમાં લેવાનો પ્રયાસ કરી રહ્યું છે, પરંતુ સમુદાયો વચ્ચેનો અવિશ્વાસ શાંતિ પુનઃસ્થાપિત કરવામાં મોટો અવરોધ છે.