રાજકોટ : એક સમયે સચિન તેંડુલકર સાથે વિક્રમી ભાગીદારી કરી વિશ્વ ક્રિકેટમાં ખળભળાટ મચાવનાર ડાબોડી બેટ્સમેન વિનોદ કાંબલી ફરી એકવાર ચર્ચામાં છે. પરંતુ આ વખતે ચર્ચા કોઈ વિવાદની નહીં, પણ તેની જીતવાની મક્કમ ઈચ્છાશક્તિની છે. ગંભીર સ્વાસ્થ્ય સમસ્યાઓ અને આર્થિક પડકારો સામે લાંબી લડત લડ્યા બાદ, કાંબલીએ દિનશોના (Dinshaw's) ‘દિલદારી’ અભિયાન દ્વારા ફરીથી જાહેર જીવનમાં ડગ માંડ્યા છે.

સંઘર્ષના દિવસોમાં મળ્યો સાચો સાથ

વિનોદ કાંબલીની આ વાપસી પાછળ માત્ર તેની હિંમત જ નહીં, પરંતુ ‘દિનશો’ બ્રાન્ડનો માનવીય અભિગમ પણ જવાબદાર છે. કાંબલીના પત્ની એન્ડ્રીયાએ ભાવુક થઈને જણાવ્યું કે, જ્યારે પરિવાર અત્યંત મુશ્કેલ સમયમાંથી પસાર થઈ રહ્યો હતો અને વિનોદની તબિયત નાજુક હતી, ત્યારે દિનશોએ એક વ્યાપારી બ્રાન્ડ તરીકે નહીં પણ એક પરિવારના સભ્ય તરીકે મદદનો હાથ લંબાવ્યો હતો.

“ચાહકોનો પ્રેમ જ મારી શક્તિ”

એન્ડ્રીયા કાંબલીએ વધુમાં ઉમેર્યું કે, “આટલા વર્ષો પછી પણ ચાહકોએ જે અતૂટ પ્રેમ આપ્યો છે, તેના માટે હું આભારી છું. વિનોદ અત્યારે ધીમે-ધીમે પણ મક્કમતાથી સ્વસ્થ થઈ રહ્યો છે. આ ‘દિલદારી’ અભિયાને તેના મનોબળને અદભૂત વેગ આપ્યો છે. કોઈ પણ ખેલાડી માટે તેનો વારસો સચવાય તે મોટી વાત છે અને દિનશોએ તે કરુણા સાથે કરી બતાવ્યું છે.”

ફરી જીતશે ચાહકોનું દિલ

દિનશોનું આ ‘દિલદારી’ અભિયાન માત્ર એક જાહેરાત નથી, પણ તે એક એવા ખેલાડીની સન્માનજનક ઘર વાપસી છે જેણે કરોડો ભારતીયોને ક્રિકેટનો રોમાંચ આપ્યો છે. કાંબલીનો આ નવો દેખાવ સોશિયલ મીડિયા પર વાયરલ થયો છે અને ક્રિકેટ પ્રેમીઓ તેને ફરીથી હસતો જોઈને ખુશ છે. કાંબલીની આ વાપસી એ વાતનો પુરાવો છે કે ભલે પિચ બદલાય, પણ ચેમ્પિયન હંમેશા લડવાનું જાણે છે.