તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
મોંઘવારીનો ઝટકો : કોલગેટ કંપનીએ ટૂથપેસ્ટના ભાવમાં ૫ ટકા સુધીનો વધારો ઝીંકયો
કાચા માલના વધતા ભાવ અને પેકેજિંગ ખર્ચને કારણે નિર્ણય લેવાયો
નવી દિલ્હી, તા.૨૯: સામાન્ય માણસના રસોડા બાદ હવે બાથરૂમનું બજેટ પણ ખોરવાયું છે. દેશની સૌથી મોટી ટૂથપેસ્ટ ઉત્પાદક કંપની કોલગેટ-પામોલિવ ઇન્ડિયાએ તેના ગ્રાહકોને મોટો ઝટકો આપતા વિવિધ પેક પર ૫ ટકા સુધીનો ભાવવધારો અમલી બનાવ્યો છે. કંપનીના જણાવ્યા અનુસાર, છેલ્લા કેટલાક સમયથી કાચા માલ, પેકેજિંગ સામગ્રી અને લોજિસ્ટિક્સ ખર્ચમાં થઈ રહેલા સતત વધારાને કારણે આ આર્થિક બોજ ગ્રાહકો પર નાખવાની ફરજ પડી છે. ઉલ્લેખનીય છે કે કંપનીની કુલ આવકનો ૮૦ ટકા હિસ્સો માત્ર ટૂથપેસ્ટના વેચાણમાંથી જ આવે છે, જે આ વધારાને કંપની માટે વ્યૂહાત્મક રીતે મહત્વપૂર્ણ બનાવે છે.
આ ભાવવધારાની અસર સીધી ખિસ્સા પર દેખાશે. કોલગેટ ડેન્ટલ ક્રીમના ૨૦૦ ગ્રામ પેકની કિંમત હવે રૂ.૫ વધીને રૂ.૧૩૫ થઈ ગઈ છે, જ્યારે ૧૦૦ ગ્રામના પેક માટે ગ્રાહકોએ રૂ.૩ વધુ એટલે કે રૂ.૭૩ ચૂકવવા પડશે. પ્રીમિયમ કેટેગરીમાં વધારો વધુ આક્રમક છે; વિઝિબલ વ્હાઇટ પર્પલના મોટા પેકમાં સીધો રૂ.૧૭નો વધારો કરવામાં આવ્યો છે, જેની નવી કિંમત રૂ.૩૯૫ સુધી પહોંચી ગઈ છે. લોકપ્રિય મેક્સ ફ્રેશ સીરીઝમાં પણ રૂ.૪નો વધારો ઝીંકાયો છે, જે દર્શાવે છે કે મધ્યમ વર્ગના ફેવરિટ ઉત્પાદનો હવે મોંઘા થયા છે.
રાહતની વાત એ છે કે વિતરકોના જણાવ્યા મુજબ, નાની એમઆરપી ધરાવતા પાઉચ કે નાના પેકના ભાવમાં હાલ કોઈ ફેરફાર કરવામાં આવ્યો નથી. આ કેટેગરીના ગ્રાહકો ભાવ પ્રત્યે અત્યંત સંવેદનશીલ હોવાથી કંપનીએ ગ્રામીણ અને નિમ્ન-મધ્યમ વર્ગને સાચવી રાખવા આ નિર્ણય લીધો હોવાનું જણાય છે. જોકે, અન્ય એફએમસીજી કંપનીઓ પણ ફુગાવાના દબાણ હેઠળ હોવાથી, આગામી દિવસોમાં સાબુ, શેમ્પૂ અને અન્ય જીવનજરૂરી વસ્તુઓના ભાવમાં પણ આવી જ રીતે વધારો થાય તેવી પૂરેપૂરી શકયતા સેવાઈ રહી છે.
(4:03 PM IST)
છેલ્લા 8 દિવસમાં સૌથી લોકપ્રિય 
