ચેન્નાઈ, તા. 12: તમિલનાડુના સુપરસ્ટારમાંથી રાજકારણી બનેલા અને હવે રાજ્યના મુખ્યમંત્રી તરીકેની કમાન સંભાળનારા સી. જોસેફ વિજયે સત્તા સંભાળતાની સાથે જ જનતાના દિલ જીતી લે તેવો મોટો નિર્ણય લીધો છે. વિજયે તેમના પ્રથમ મોટા વહીવટી કાર્યમાં રાજ્યભરમાં કાર્યરત 717 TASMAC (સરકારી દારૂની દુકાનો) તાત્કાલિક અસરથી બંધ કરવાનો આદેશ આપ્યો છે. આ એવા સ્થળો છે જે શૈક્ષણિક સંસ્થાઓ, ધાર્મિક સ્થળો અને બસ સ્ટેન્ડથી માત્ર 500 મીટરના અંતરે આવેલા હતા.
કમલ હાસને આપી શાબાશી: "આ તો માત્ર શરૂઆત છે"
દિગ્ગજ અભિનેતા અને રાજકારણી કમલ હાસને મુખ્યમંત્રી વિજયના આ નિર્ણયને સોશિયલ મીડિયા પર ખુલ્લેઆમ સમર્થન આપ્યું છે. તેમણે ટ્વિટ (X) કરતા જણાવ્યું કે, "એક એવો સમય હતો જ્યારે તમિલ પરિવારો આ દુકાનો હટવાની રાહ જોતા હતા, અને 'થંબી' (નાના ભાઈ) વિજયે પદ સંભાળતા જ આ કરી બતાવ્યું. દારૂ વેચવો એ સરકારનું કામ ન હોવું જોઈએ, પરંતુ તેના સેવન પર નિયંત્રણ રાખવું એ સરકારની જવાબદારી છે. આ પ્રક્રિયા ચાલુ રહેવી જોઈએ અને દુકાનોની સંખ્યા હજુ પણ ઘટવી જોઈએ."
વિશાલે વીડિયો શેર કરી વ્યક્ત કરી ખુશી
અન્ય એક લોકપ્રિય અભિનેતા વિશાલે આ નિર્ણય પર હર્ષ વ્યક્ત કરતા એક વીડિયો શેર કર્યો હતો. તેમણે ખાસ કરીને આર.કે. નગરનો ઉલ્લેખ કરતા જણાવ્યું કે, શાળાએ જતી દીકરીઓને દારૂની દુકાનો પાસે જે માનસિક તણાવ અને હેરાનગતિનો સામનો કરવો પડતો હતો, તેમાંથી હવે મુક્તિ મળશે. વિશાલે વિજયને સંબોધતા લખ્યું, "મારા મુખ્યમંત્રીના આ નિર્ણયથી લાખો ચહેરા પર સ્મિત આવશે. હું તમને અને તમારી સરકારને સલામ કરું છું."
રાજકારણમાં વિજયની 'થલપતિ' સ્ટાઈલ એન્ટ્રી
સામાન્ય રીતે રાજકારણીઓ મોટા નિર્ણયો લેવામાં સમય લેતા હોય છે, પરંતુ વિજયે મુખ્યમંત્રી તરીકેના પ્રથમ જ પગલે સ્પષ્ટ કરી દીધું છે કે તેઓ રાજ્યના સામાજિક માળખામાં મોટા સુધારા કરવાના મૂડમાં છે. લોકો હવે આતુરતાથી જોઈ રહ્યા છે કે 'થલપતિ' વિજય આગામી દિવસોમાં તમિલનાડુના વિકાસ માટે કયા નવા ક્રાંતિકારી નિર્ણયો લેશે.