ચેન્નાઈ, તા.૧૩: તમિલનાડુના રાજકારણમાં સુપરસ્ટારમાંથી નેતા બનેલા સી. જોસેફ વિજયે મુખ્યમંત્રી પદની ધુરા સંભાળતાની સાથે જ મોટા વિવાદોનો સામનો કરવો પડ્યો છે. બુધવારે તમિલનાડુ વિધાનસભામાં વિશ્વાસ મત જીત્યાના થોડા જ કલાકો પહેલા, વિજય સરકારે તેમના અંગત જ્યોતિષી રિકી રાધન પંડિત વેટ્રીવેલની મુખ્યમંત્રી કાર્યાલયમાં ઓફિસર ઓન સ્પેશિયલ ડ્યુટી (OSD) તરીકે કરેલી નિમણૂક રદ કરવી પડી હતી. આ નિર્ણયને કારણે રાજ્યમાં ભારે રાજકીય નાટક સર્જાયું છે.

જ્યોતિષીની નિમણૂક પર કેમ થયો હોબાળો?

૧૩ મે, ૨૦૨૬ના રોજ સરકારે જ્યોતિષી રિકી રાધનની નિમણૂકનો આદેશ જારી કર્યો હતો. જોકે, આ જાહેરાત થતાની સાથે જ વિપક્ષી દળો અને ખુદ વિજયની 'તમિલગા વેટ્રી કઝગમ' (TVK) સરકારના સાથી પક્ષોએ મોરચો ખોલ્યો હતો. વિપક્ષી નેતાઓએ સવાલ ઉઠાવ્યો હતો કે વહીવટી તંત્રમાં એક જ્યોતિષીની શું ભૂમિકા હોઈ શકે? સોશિયલ મીડિયામાં પણ આ મુદ્દે ઉગ્ર ચર્ચાઓ શરૂ થઈ હતી અને સરકાર પર વહીવટમાં અંધશ્રદ્ધાને પ્રોત્સાહન આપવાનો ગંભીર આરોપ મૂકવામાં આવ્યો હતો. દબાણ વધતા સરકારે આખરે આદેશ પાછો ખેંચવો પડ્યો હતો.

વિજયે જીત્યો વિશ્વાસનો મત: ૨૫ બળવાખોરોનો સાથ મળ્યો

રાજકીય વિવાદો વચ્ચે સી. જોસેફ વિજયે વિધાનસભામાં પોતાની તાકાત બતાવી દીધી છે. ફ્લોર ટેસ્ટ દરમિયાન વિજયની તરફેણમાં ૧૪૪ મતો પડ્યા હતા, જે બહુમતીના આંકડા કરતા ઘણા વધારે છે. ખાસ વાત એ રહી કે AIADMKના ૨૫ બળવાખોર ધારાસભ્યોએ એડાપ્પડી કે. પલાનીસ્વામીની ચેતવણીને અવગણીને સરકારના સમર્થનમાં મતદાન કર્યું હતું, જેનાથી વિજયની સ્થિતિ મજબૂત બની છે.

વિપક્ષનો વોકઆઉટ અને હાઈકોર્ટનો સ્ટે

વિશ્વાસ મત દરમિયાન વિપક્ષી દળ DMK અને DMDK ના ધારાસભ્યોએ કાર્યવાહીનો બહિષ્કાર કરીને વોકઆઉટ કર્યો હતો. બીજી તરફ, ભાજપ અને PMKના ધારાસભ્યો મતદાનથી દૂર રહ્યા હતા. એક રસપ્રદ વળાંકમાં, મદ્રાસ હાઈકોર્ટના આદેશને કારણે એક ધારાસભ્ય મતદાન કરી શક્યા નહોતા, તેમ છતાં વિજય સરકારે આરામદાયક જીત મેળવી હતી. હવે જોવાનું એ રહેશે કે 'થલપતિ' વિજય આ રાજકીય અસ્થિરતા અને વિવાદો વચ્ચે તમિલનાડુના શાસનને કેવી નવી દિશા આપે છે.