ચેન્નાઈ: તમિલનાડુના નવનિયુક્ત મુખ્યમંત્રી સી. જોસેફ વિજયે રવિવારે શપથ ગ્રહણ કર્યાના ગણતરીના કલાકોમાં જ જનતા માટે લોકકલ્યાણકારી યોજનાઓનો પટારો ખોલી દીધો છે. સત્તા સંભાળતાની સાથે જ તેમણે ચૂંટણી વચનોને પ્રાથમિકતા આપીને અનેક મહત્વની ફાઈલો પર હસ્તાક્ષર કર્યા હતા, જેમાં ઘરેલુ ગ્રાહકોને દર મહિને ૨૦૦ યુનિટ મફત વીજળી આપવાના ઐતિહાસિક નિર્ણયનો સમાવેશ થાય છે. આ ઉપરાંત, રાજ્યમાં મહિલાઓની સુરક્ષા સુનિશ્ચિત કરવા માટે એક વિશેષ સુરક્ષા દળની રચના કરવાની જાહેરાત કરીને તેમણે સ્પષ્ટ સંકેત આપ્યો છે કે તેમની સરકાર જનતાને આપેલા વચનો પ્રત્યે પ્રતિબદ્ધ છે.

શપથ વિધિ બાદ મુખ્યમંત્રીએ રાજકીય આક્રમકતા બતાવતા પાછલી ડીએમકે સરકાર પર આકરા પ્રહારો કર્યા હતા. તેમણે જાહેરાત કરી હતી કે ૨૦૨૧ થી ૨૦૨૬ સુધીના રાજ્યના આર્થિક વહીવટ પર એક શ્વેતપત્ર બહાર પાડવામાં આવશે, કારણ કે પાછલી સરકાર રાજ્ય પર ૧૦ લાખ કરોડનું જંગી દેવું છોડી ગઈ છે. વિજયે ભારપૂર્વક જણાવ્યું હતું કે જનતાએ જાણવું જરૂરી છે કે તેમને કયા કપરા આર્થિક સંજોગોમાં રાજ્યની જવાબદારી સોંપવામાં આવી છે. આ શ્વેતપત્ર દ્વારા રાજ્યની વાસ્તવિક આર્થિક સ્થિતિ અને પાછલી સરકારના વહીવટની પોલ ખોલવાની રણનીતિ પણ સ્પષ્ટ દેખાઈ રહી છે.

જનતાને સીધી રાહત આપતા અન્ય નિર્ણયોમાં મહિલાઓ માટે સરકારી પરિવહન નિગમની બસોમાં મફત મુસાફરી યોજના તાત્કાલિક અસરથી લાગુ કરવાના આદેશો આપવામાં આવ્યા છે. મુખ્યમંત્રીએ અધિકારીઓ સાથેની બેઠકમાં સ્પષ્ટ સૂચના આપી છે કે સરકારી યોજનાઓના અમલીકરણમાં કોઈપણ પ્રકારનો વિલંબ સહન કરવામાં આવશે નહીં અને તેનો લાભ છેવાડાના માનવી સુધી પહોંચવો જોઈએ. "લોકોની સરકાર" હોવાના મંત્ર સાથે વિજયે વહીવટી તંત્રને ગતિશીલ બનાવીને જનતાના ભરોસા પર ખરા ઉતરવાના પ્રયાસો તેજ કરી દીધા છે.