ગ્રેટર નોઈડા : ગ્રેટર નોઈડાના કોતવાલી વિસ્તારમાં વાહનોના કાફલા દ્વારા કરવામાં આવેલા ખતરનાક સ્ટંટના ત્રણ વીડિયો સોશિયલ મીડિયા પર જોરશોરથી વાયરલ થઈ રહ્યા છે, જેમાં કેટલાક તોફાની યુવાનો વાહનો સાથે અરાજકતા ફેલાવતા નજરે પડે છે.

આ વાઈરલ વીડિયોમાં મોટાભાગના યુવાનો ગાડીઓની બારીઓ અડધી ખુલ્લી રાખીને બહાર નીકળીને જોખમી રીતે નાચતા જોવા મળે છે, જેના કારણે ટ્રાફિક નિયમોનું ખુલ્લેઆમ ઉલ્લંઘન થયું છે અને રસ્તા પર ચાલતા નિર્દોષ રાહદારીઓનો જીવ જોખમમાં મુકાયો છે.

પ્રાપ્ત માહિતી અનુસાર આ વાયરલ વીડિયો બુધવારનો છે જે શનિવારે સોશિયલ મીડિયા પર વાયરલ થયો હતો, અને વાહનોનો આ કાફલો કોઈના સ્વાગત માટે કાનારસી ગામથી નીકળીને સલેમપુર ગુર્જર ગામ સુધી પહોંચ્યો હતો જ્યાં આ પ્રકારે બેફામ સ્ટંટ કરવામાં આવ્યા હતા.

સ્ટંટનો આ વીડિયો સામે આવ્યા બાદ પોલીસે ત્વરિત તપાસ શરૂ કરી છે અને આવા અસામાજિક તત્વો સામે કાયદાકીય સકંજો કસીને આગામી સમયમાં કડક દંડાત્મક પગલાં લેવાની કાર્યવાહી હાથ ધરવામાં આવી છે.