નવી દિલ્હી, તા.૧૭: ભારતના સ્પેસ સેક્ટર (અંતરિક્ષ ક્ષેત્ર) માટે આવતીકાલનો દિવસ એટલે કે ૧૮ જુલાઈ સોનેરી અક્ષરે લખાવા જઈ રહ્યો છે. દેશના અગ્રણી પ્રાઈવેટ સ્પેસ સ્ટાર્ટઅપ 'સ્કાયરૂટ એરોસ્પેસ' (Skyroot Aerospace) દ્વારા તૈયાર કરાયેલા પ્રથમ ઓર્બિટલ-ક્લાસ રોકેટ 'વિક્રમ-1' ની પ્રથમ પરીક્ષણ ઉડાન (Test Flight-1) યોજાવા જઈ રહી છે. આ ઐતિહાસિક મિશનની સૌથી ખાસ અને ગૌરવપૂર્ણ બાબત એ છે કે આ રોકેટ પોતાની સાથે વડાપ્રધાન નરેન્દ્ર મોદીનું હસ્તલિખિત 'વંદે માતરમ' લખેલું પોસ્ટકાર્ડ લઈને અંતરિક્ષની યાત્રા પર જશે. કંપનીએ શુક્રવારે સોશિયલ મીડિયા પર આ અદ્ભુત જાહેરાત કરી છે.

સ્કાયરૂટ એરોસ્પેસે સોશિયલ મીડિયા પ્લેટફોર્મ 'X' પર પોસ્ટ શેર કરતા જણાવ્યું છે કે, પીએમ મોદીનો આ હસ્તલિખિત સંદેશ મિશન પર મોકલવામાં આવી રહેલા વિશેષ સ્મારક પેલોડ્સનો એક મુખ્ય હિસ્સો હશે. આ યાદગાર મિશનમાં પીએમ મોદીના કાર્ડ સાથે કંપનીની ટીમ, રોકાણકારો, પોલિસી મેકર્સ અને દુનિયાભરના શુભેચ્છકોની હસ્તલિખિત નોંધ પણ અવકાશમાં મોકલવામાં આવશે, જે ભારતના સતત વધી રહેલા ખાનગી સ્પેસ ઇકોસિસ્ટમના સામૂહિક સમર્થનનું પ્રતીક છે.

ભારતીય ભૂમિ પરથી ખાનગી ક્ષેત્રની પ્રથમ ઓર્બિટલ ફ્લાઈટ

હૈદરાબાદ સ્થિત આ સ્પેસ સ્ટાર્ટઅપે સત્તાવાર માહિતી આપતા જણાવ્યું છે કે, ૧૮ જુલાઈના રોજ શ્રીહરિકોટાના સતીશ ધવન સ્પેસ સેન્ટર (SDSC-SHAR) ખાતેના પ્રથમ લોન્ચ પેડ પરથી 'વિક્રમ-1' ના લોન્ચિંગનો પ્રયાસ કરવામાં આવશે. ભારતના ઇતિહાસમાં આ પ્રથમ વખત બનશે જ્યારે દેશની જ ધરતી પરથી સંપૂર્ણપણે ખાનગી ક્ષેત્ર દ્વારા વિકસિત કરવામાં આવેલું કોઈ ઓર્બિટલ-ક્લાસ રોકેટ ઉડાન ભરશે. આ મિશનનો મુખ્ય હેતુ સ્વદેશી ટેકનોલોજીની ક્ષમતાઓનું પ્રદર્શન કરવાનો અને વૈશ્વિક સ્તરે ભારતની વ્યાપારી અવકાશ મહત્વાકાંક્ષાઓને નવી ઉંચાઈ પર લઈ જવાનો છે.

રોકેટ પોતાની સાથે શું-શું લઈ જશે? સુરક્ષા વ્યવસ્થા ચુસ્ત

'વિક્રમ-1' રોકેટ પીએમ મોદીના સ્મારક પેલોડ ઉપરાંત અન્ય અનેક મહત્વના ટેકનોલોજીકલ પેલોડ્સ પણ પોતાની સાથે અવકાશમાં લઈ જશે. જેમાં ગ્રહા સ્પેસ, કોસ્મોસર્વ, ડીક્યુબેડ અને સ્કાયરૂટના પોતાના 'SCOPE' ના ટેકનોલોજી ડેમોન્સ્ટ્રેશન પેલોડ્સ સામેલ છે. આ ઉપરાંત કોસ્મોસ ડાયમંડ્સ દ્વારા બનાવવામાં આવેલ 'કોસ્મિક બ્લૂમ' અને એક ખાસ માઇક્રો-આર્ટ પેલોડ પણ આ રોકેટનો હિસ્સો બનશે.

આ હાઈ-પ્રોફાઈલ લોન્ચિંગને ધ્યાનમાં રાખીને સુરક્ષાના તમામ કડક પગલાં લેવામાં આવ્યા છે. સત્તાવાળાઓ દ્વારા જરૂરી એરસ્પેસ (હવાઈ ક્ષેત્ર) અને દરિયાઈ મંજૂરીઓ અગાઉથી જ મેળવી લેવામાં આવી છે. રોકેટના પ્રક્ષેપણના રૂટ અને સંભવિત અસરવાળા વિસ્તારોમાં પ્રતિબંધિત ઝોન જાહેર કરીને વહીવટીતંત્રે જરૂરી નોટિસ પણ જારી કરી દીધી છે. સમગ્ર દેશ હવે આ ઐતિહાસિક પળનો સાક્ષી બનવા માટે ઉત્સુક છે.