દહેરાદુન,તા.૨૦: ઉત્તરાખંડ સરકારનાં પ્રધાન રેખા આર્યના પતિ ગિરધારી લાલ સાહુએ શુક્રવારે પત્‍ની પર ૨૧૦ કરોડ રૂપિયાની ગેરકાયદે સંપત્તિ એકત્ર કરવાનો આરોપ લગાવીને સનસનાટી મચાવી હતી. ગિરધારી લાલ સાહુએ માગણી કરી હતી કે મેં લગાવેલા આરોપોની તપાસ કરવામાં આવે. આ પહેલાં ગુરુવારે રેખા આર્યાએ તેમના પતિ પર શારીરિક હુમલો કરવાનો, સતામણી કરવાનો અને જાનથી મારી નાખવાની ધમકી આપવાનો આરોપ લગાવ્‍યો હતો. રેખા આર્યએ એવો પણ આરોપ મૂક્‍યો છે કે મારા પતિએ તેમનાં આગલાં લગ્ન મારાથી છુપાવ્‍યાં હતાં અને અત્‍યારે પણ તેમના અન્‍ય મહિલાઓ સાથે સંબંધ છે. આ બધા આરોપો સાથે તેમણે પતિ સામે પોલીસમાં ફર્સ્‍ટ ઇન્‍ફર્મેશન રિપોર્ટ પણ નોંધાવ્‍યો હતો.

શુક્રવારે જાહેર કરાયેલા એક વિડિયોમાં ગિરધારી લાલ સાહુએ મુખ્‍ય પ્રધાન પુષ્‍કર સિહ ધામીને આ કથિત ભ્રષ્ટાચારની યોગ્‍ય એજન્‍સી દ્વારા તપાસ કરાવવાનો આદેશ આપવા વિનંતી કરી છે.

ગુરુવારે સાંજે રેખા આર્ય દ્વારા શેર કરવામાં આવેલા એક ઑડિયો-રેકોર્ડિગને ગિરધારી લાલ સાહુએ નકલી, આર્ટિફિશ્‍યલ ઇન્‍ટેલિજન્‍સ (AI) દ્વારા જનરેટેડ અને બનાવટી ગણાવીને ફગાવી દીધું હતું; તેમણે આરોપ લગાવ્‍યો કે આ રેકોર્ડિગ પરિવારમાં મતભેદ પેદા કરવા માટે ફેલાવવામાં આવ્‍યું હતું.

સાહુએ પોતાની સામેના આરોપોને પાયાવિહોણા ગણાવ્‍યા અને પત્‍નીને અપીલ કરી કે તે ફર્સ્‍ટ ઇન્‍ફર્મેશન રિપોર્ટ (FIR) પાછો ખેંચી લે અને પોતાનાં નિવેદનો પાછાં ખેંચી લે.

પ્રધાનપદને કારણે આવેલી અહંકારી વૃત્તિ વિશે ચેતવણી આપતાં ગિરધારી લાલ સાહુએ કહ્યું હતું કે ‘રેખાને જાહેર જીવનમાં આગળ વધવામાં મેં આપેલી મદદને તે ભૂલી ગઈ છે. આજે તું સત્તામાં છે, પરંતુ તું એ દિવસો ભૂલી ગઈ છે, મેં તને ત્‍યાં પહોંચવામાં મદદ કરી છે. હું તેને અહીં સુધી લાવ્‍યો છું, તે રસ્‍તા પર ઊભેલી એક સામાન્‍ય ષી હતી. જો તમે તમારું નિવેદન પાછું નહીં ખેંચો, તો ભોલે બાબા તમને દરેક બાબત માટે જવાબદાર ઠેરવશે.'

પતિના આરોપોનો જવાબ આપતાં રેખા આર્યાએ ગઈ કાલે એક નિવેદન બહાર પાડીને બધા આરોપોને પાયાવિહોણા ગણાવ્‍યા હતા. તેમણે કહ્યું હતું કે ‘તેઓ ફરિયાદ પાછી ખેંચશે નહીં, કારણ કે ઑડિયો સંપૂર્ણપણે સાચો છે અને AI જનરેટેડ નથી. હું મારા દેવતા ગોલુ બાબાના શપથ લઈને કહું છું કે મારી ફરિયાદ સાચી છે, પતિએ મારી સામે લગાવેલા તમામ આરોપો જૂઠા છે.'