વોશિંગ્ટન:  અમેરિકન રાષ્ટ્રપતિ ડોનાલ્ડ ટ્રમ્પે ઈરાન પરમાણુ કરાર અને હોર્મુઝ સ્ટ્રેટના વ્યૂહાત્મક જળમાર્ગ મુદ્દે અત્યંત આક્રમક વલણ અપનાવ્યું છે. કેબિનેટ બેઠક દરમિયાન ટ્રમ્પે સ્પષ્ટ કર્યું કે તેઓ દેશની આગામી મધ્યસત્ર ચૂંટણીઓની પરવા કર્યા વિના સમગ્ર વિશ્વના હિતમાં કામ કરી રહ્યા છે અને ઈરાનને કોઈપણ સંજોગોમાં પરમાણુ શસ્ત્રો મેળવવા દેવામાં આવશે નહીં. હોર્મુઝ સ્ટ્રેટ અંગે કડક સંદેશ આપતા તેમણે જણાવ્યું કે આ આંતરરાષ્ટ્રીય જળમાર્ગ છે જેના પર કોઈ એક દેશ પોતાનો અધિકાર જમાવી શકે નહીં અને તે તમામ માટે ખુલ્લો રહેશે, જે અમેરિકાની આગામી વાટાઘાટોનો મુખ્ય હિસ્સો છે.

આ વિવાદમાં રાષ્ટ્રપતિ ટ્રમ્પે ઓમાનને પણ આડકતરી રીતે આકરા શબ્દોમાં ચેતવણી આપી દીધી છે કે તે હોર્મુઝના મુદ્દામાં બિનજરૂરી દખલગીરી કરવાથી દૂર રહે. ટ્રમ્પે જણાવ્યું કે જો ઓમાન બીજા દેશોની જેમ સામાન્ય વર્તન નહીં રાખે તો અમેરિકાએ તેની સામે પણ કડક પગલાં ભરવા પડશે. ટ્રમ્પના મતે ઈરાની નેતાઓ કરાર કરવા ઈચ્છુક ચોક્કસ છે પરંતુ વર્તમાન વાટાઘાટોથી અમેરિકા હજી સંતુષ્ટ નથી. જો આ વાટાઘાટો સમયસર કોઈ સકારાત્મક પરિણામ પર નહીં પહોંચે, તો અમેરિકા આ મુદ્દાનો પોતાની રીતે અંત લાવવા માટે સંપૂર્ણ સક્ષમ છે.

બીજી તરફ, અમેરિકા અને ઈરાન વચ્ચે કોઈ પ્રારંભિક પરમાણુ કરાર થઈ ગયો હોવાના ઈરાની સરકારી મીડિયાના અહેવાલોને વ્હાઇટ હાઉસે સત્તાવાર રીતે નકારી કાઢ્યા છે. વ્હાઇટ હાઉસે નિવેદન જારી કરીને જણાવ્યું છે કે ઈરાની મીડિયા દ્વારા ફેલાવવામાં આવી રહેલી અફવાઓ સંપૂર્ણપણે ખોટી અને પાયાવિહોણી છે. આ આંતરરાષ્ટ્રીય તણાવ વચ્ચે ટ્રમ્પ પ્રશાસને સ્પષ્ટ સંકેત આપ્યા છે કે જ્યાં સુધી અમેરિકાના હિતોનું સંપૂર્ણ રક્ષણ ન થાય ત્યાં સુધી ઈરાન સામેના કડક આર્થિક અને સૈન્ય પ્રતિબંધો યથાવત રહેશે.