વોશિંગ્ટન : ઈરાન સાથે ચાલી રહેલા તણાવ અને યુદ્ધની સ્થિતિ વચ્ચે અમેરિકી લશ્કરી કમાન્ડ (CENTCOM) ની મુશ્કેલીઓમાં સતત વધારો થઈ રહ્યો છે. સંઘર્ષનો કોઈ અંત ન દેખાતાં અને પરંપરાગત લશ્કરી વિકલ્પો મર્યાદિત બનતાં, CENTCOM ની ગુપ્તચર શાખાએ પોતાના વિશ્લેષકો અને કર્મચારીઓને તેહરાન પર દબાણ લાવવા માટે "સર્જનાત્મક અને અપરંપરાગત" (Creative and Unconventional) રીતો સૂચવવા માટે આહ્વાન કર્યું છે. લશ્કરી વર્તુળોમાં ઈમેલ દ્વારા આવી 'ક્રાઉડસોર્સિંગ' શૈલીમાં વિચારો માગવાની ઘટનાને અત્યંત અસાધારણ ગણાવવામાં આવી રહી છે.
અમેરિકી પ્રમુખ ડોનાલ્ડ ટ્રમ્પ ઈરાનને પોતાની શરતો પર સમજૂતી કરવા માટે મજબૂર કરવા માંગે છે, પરંતુ અત્યાર સુધીના તમામ હવાઈ હુમલાઓ અપેક્ષિત પરિણામ આપી શક્યા નથી. તાજેતરમાં જ ટ્રમ્પે ઈરાન પર વધુ એક મોટા હુમલાની યોજના બનાવી હતી, પરંતુ સાઉદી અરેબિયા સહિતના પ્રાદેશિક દેશોના હસ્તક્ષેપ બાદ આ પ્લાન છેલ્લી ઘડીએ રદ કરવો પડ્યો હતો. સીઆઈએ (CIA) અને જોઈન્ટ ચીફ્સ ઓફ સ્ટાફના અધ્યક્ષ જનરલ ડેન કેન જેવા વરિષ્ઠ સલાહકારોએ પણ સ્વીકાર્યું છે કે માત્ર હવાઈ શક્તિ (Air Power) ની પોતાની મર્યાદાઓ છે અને તેનાથી ઈરાનનું વલણ બદલાવું મુશ્કેલ છે.
યુએસ સેન્ટ્રલ કમાન્ડ હાલ ઈરાનના પિકેક્સ માઉન્ટેન જેવા અત્યંત ઊંડા ભૂગર્ભ પરમાણુ મથકો પર હુમલા કરવાની યોજનાઓ વિચારી રહ્યું છે. પરંતુ નિષ્ણાતોના મતે, અમેરિકાના સૌથી શક્તિશાળી બોમ્બ પણ આ ઊંડા મથકોને સંપૂર્ણ નષ્ટ કરવા માટે પૂરતા નથી. તે માટે ભૂમિ દળો (Ground Troops) તૈનાત કરવા પડે તેમ છે, જે મોટું જોખમ ધરાવે છે. અત્યાર સુધી આ સંઘર્ષમાં ૧૮ અમેરિકી સૈનિકો શહીદ થયા છે, જેના કારણે અમેરિકામાં રાજકીય દબાણ પણ વધી રહ્યું છે.
ટ્રમ્પ સામે અત્યારે સૌથી મોટું ધર્મસંકટ એ છે કે તેઓ પોતાના સમર્થકોને આપેલું "અનંત વિદેશી યુદ્ધો ન લડવાનું" વચન પાળશે કે પછી ઈરાન સામે સૈન્ય કાર્યવાહી વધુ તેજ કરશે. જો યુએસ સૈન્ય પાછું હટે છે તો હોર્મુઝ સ્ટ્રેટમાં શિપિંગ સેવાઓ પર ઈરાનનો ભય યથાવત રહેશે, અને જો યુદ્ધ લંબાય છે તો અમેરિકા વધુ એક લાંબા સંઘર્ષમાં ફસાઈ શકે છે. આ પરિસ્થિતિમાંથી બહાર નીકળવા માટે જ હવે અમેરિકી સેના નવીન અને ગેર-પરંપરાગત વ્યૂહરચનાઓ શોધવા માટે મજબૂર બની છે.