વોશિંગ્ટન, તા.૧૪: અમેરિકામાં સ્થાયી થયેલા હજારો ભારતીય પરિવારો માટે એક અત્યંત મહત્વપૂર્ણ અને આંશિક રાહત આપતા સમાચાર આવ્યા છે. અમેરિકી ડિસ્ટ્રિક્ટ કોર્ટે ઓક્ટોબર ૨૦૨૫માં ટ્રમ્પ વહીવટીતંત્ર દ્વારા લાવવામાં આવેલા તે વિવાદિત નિયમને ફગાવી દીધો છે, જેણે H-4 EAD (એમ્પ્લોયમેન્ટ ઓથોરાઇઝેશન ડોક્યુમેન્ટ)ના ઓટોમેટિક એક્સટેન્શન (સ્વચાલિત મુદત વધારા) પર સંપૂર્ણપણે રોક લગાવી દીધી હતી. જોકે, આ ચુકાદામાં એક મોટો કેચ છે—કોર્ટે આપેલી આ કાનૂની રાહત દેશવ્યાપી લાગુ નહીં થાય, પરંતુ માત્ર તે સાત અરજદારો પૂરતી જ મર્યાદિત રહેશે જેમણે સરકાર સામે અદાલતમાં પડકાર ફેંક્યો હતો.

કેલિફોર્નિયાની સેન્ટ્રલ ડિસ્ટ્રિક્ટ કોર્ટના જજ ડેવિડ ઓ. કાર્ટરે ચુકાદો આપતાં સ્પષ્ટ કર્યું કે ડિપાર્ટમેન્ટ ઓફ હોમલેન્ડ સિક્યુરિટી (DHS) એ આ નિયમ રદ કરતી વખતે 'એડમિનિસ્ટ્રેટિવ પ્રોસિજર એક્ટ' હેઠળ નક્કી કરાયેલી કાયદાકીય પ્રક્રિયાઓનો અનાદર કર્યો હતો. સરકારે રાષ્ટ્રીય સુરક્ષા અને સઘન બેકગ્રાઉન્ડ ચેકનું બહાનું ધરીને નોટિસ-એન્ડ-કોમેન્ટની પ્રક્રિયા બાયપાસ કરી હતી, જેને અદાલતે સખત શબ્દોમાં ફગાવી દીધી છે. કોર્ટે નોંધ્યું કે સરકાર પાસે પહેલેથી જ સતત તપાસ કરવાની સિસ્ટમ ઉપલબ્ધ છે, અને આ નિર્ણયથી H-4 વિઝા ધારક મહિલાઓ, તેમના રોજગાર અને પરિવારો પર પડનારી ગંભીર આર્થિક અસરોનો સરકારે કોઈ વિચાર જ કર્યો નહોતો.

ભારતીય સમુદાય માટે આટલું મહત્વનું કેમ?
અમેરિકામાં H-1B વિઝા ધારકોના જીવનસાથી (જેમાં ૯૦%થી વધુ ભારતીય મહિલાઓ છે) H-4 વિઝા પર રહે છે. જો H-1B ધારકનો ગ્રીન કાર્ડનો રસ્તો સાફ થઈ ગયો હોય, તો તેમના જીવનસાથીને H-4 EAD હેઠળ અમેરિકામાં નોકરી કે બિઝનેસ કરવાની મંજૂરી મળે છે. જૂના નિયમો મુજબ, રિન્યુઅલ અરજી પેન્ડિંગ હોય ત્યારે પણ ૫૪૦ દિવસ સુધી કામ કરવાની સ્વચાલિત છૂટ મળતી હતી. પરંતુ ટ્રમ્પ સરકારના ઓક્ટોબર ૨૦૨૫ના કડક નિર્ણય બાદ USCIS ના પ્રોસેસિંગ વિલંબના કારણે હજારો ભારતીય મહિલાઓએ પોતાની નોકરીઓ ગુમાવવાનો વારો આવ્યો હતો.

રાહત મોટી, પણ દાયરો સીમિત
વાદીઓનું પ્રતિનિધિત્વ કરતા લિટિગેશન એટર્ની જોનાથન વાસડેને આ ચુકાદાને સરકારના ગેરકાયદેસર નીતિઓ સામે મોટો વિજય ગણાવ્યો છે. પરંતુ, વાસ્તવિકતા એ છે કે ૧,૦૦,૦૦૦થી વધુ ભારતીય H-4 EAD ધારકો હજુ પણ જૂના કડક નિયમોના દાયરામાં જ રહેશે. જો બાકીના ભારતીય વિઝા ધારકોએ આ ઓટોમેટિક એક્સટેન્શનનો લાભ મેળવવો હોય, તો તેમણે કાં તો વ્યક્તિગત રીતે કોર્ટના દરવાજા ખખડાવવા પડશે અથવા સરકારે દેશવ્યાપી નીતિ બદલાય ત્યાં સુધી રાહ જોવી પડશે.