જેરુસલેમ : કેલિફોર્નિયાના ડેમોક્રેટિક કોંગ્રેસમેન રો ખન્નાએ આરોપ લગાવ્યો છે કે પશ્ચિમ કાંઠાના પેલેસ્ટિનિયન ગામોની મુલાકાત દરમિયાન સશસ્ત્ર ઇઝરાયલી વસાહતીઓએ તેમને અને તેમના પ્રતિનિધિમંડળને અમેરિકન બનાવટની M-4 રાઇફલ્સ બતાવી બંધક બનાવી રાખ્યા હતા, જે બાદમાં ત્યાં પહોંચેલી ઇઝરાયલી સેનાએ પણ વસાહતીઓનો પક્ષ લીધો હતો.

ખન્નાએ સોશિયલ મીડિયા પર આ ઘટનાની વિગતો આપતા જણાવ્યું હતું કે, તેઓ એક પેલેસ્ટિનિયન ગામમાં ગયા હતા જ્યાં અગાઉ થયેલા હુમલામાં શાળા સહિતની ઇમારતોને નુકસાન થયું હતું. વસાહતીઓએ તેમને જવા દેવાનો ઇનકાર કર્યો અને સેનાને બોલાવી હતી, પરંતુ ઘટનાસ્થળે પહોંચેલી IDFની ટુકડીએ મદદ કરવાને બદલે વસાહતીઓને સમર્થન આપ્યું હતું. ખન્ના સાથે રહેલા કેમેરોન કાસ્કીએ જણાવ્યું હતું કે આ કટોકટીના સમયે તેમણે જેરુસલેમમાં યુએસ દૂતાવાસનો સંપર્ક કરવો પડ્યો હતો.

આ ઘટનાએ પશ્ચિમ કાંઠે વસાહતીઓની વધતી જતી હિંસા અને ઇઝરાયલને અપાતી અમેરિકન લશ્કરી સહાયના ઉપયોગ પર આંતરરાષ્ટ્રીય સ્તરે ચિંતા જન્માવી છે. કોંગ્રેસમેને ગંભીર આક્ષેપ કરતા કહ્યું કે વસાહતીઓ પાસે અમેરિકન શસ્ત્રો હોવા એ કબજા હેઠળના પ્રદેશોમાં શસ્ત્રોના ઉપયોગ અંગેના સુરક્ષા ધોરણો પર મોટો પ્રશ્નાર્થ ચિહ્ન મૂકે છે.

આ ઘટના બાદ હવે અમેરિકન રાજકીય વર્તુળોમાં ઇઝરાયલને અપાતી સહાયની દેખરેખ અને તેના લશ્કરી ઉપયોગની તપાસ કરવાની માંગ વધુ પ્રબળ બની છે. યુએસ વહીવટીતંત્ર પર આ મામલે સ્પષ્ટતા કરવા અને વધતી જતી વસાહતી હિંસાને રોકવા માટે દબાણ વધવાની શક્યતા છે.