વોશિંગ્ટન, તા.26: અમેરિકી ઇમિગ્રેશન સર્વિસીસ (USCIS) દ્વારા $100,000 (આશરે ₹83 લાખથી વધુ)ની ભારેભરખમ ફી વસૂલ્યા વિના H-1B વિઝા અરજીઓને મંજૂર કરવાની પ્રક્રિયા શરૂ કરી દેવામાં આવી છે. ફેડરલ કોર્ટના ચુકાદા બાદ લેવાયેલા આ નિર્ણયથી પ્રીમિયમ પ્રોસેસિંગની 15 દિવસની સમયમર્યાદા પૂરી થયા પછી પણ અટકેલી હજારો અરજીઓને લીલી ઝંડી મળી છે. આ પગલાથી યુએસ કંપનીઓ અને ખાસ કરીને ભારતીય આઇટી ક્ષેત્રના કુશળ કામદારોને મોટી રાહત મળી છે, જેના કારણે વિદેશમાં રહેતા અનુભવી ઉમેદવારો માટે અમેરિકામાં રોજગારી મેળવવાનો માર્ગ ફરી ખુલ્લો થયો છે.

નવા નિયમો મુજબ, ફેડરલ કોર્ટે ફીની આ અન્યાયી શરત પર રોક લગાવી દીધી છે, જેના આધારે નોકરીદાતાઓએ આ વધારાની ફી ચૂકવ્યા વિના જ અરજીઓ ફાઇલ કરી હતી. મેલ્ટઝર હેલ્રંગ ઇમિગ્રેશન લો ફર્મના જણાવ્યા અનુસાર, મુકદ્દમાની કાર્યવાહી અને કોર્ટના આદેશ બાદ યુએસસીઆઈએસ દ્વારા અરજીઓનો ઝડપી નિકાલ કરવામાં આવી રહ્યો છે. જોકે, તમામ સેવા કેન્દ્રો પર કામગીરીની ગતિ એકસરખી ન હોવાથી કેટલીક પેન્ડિંગ અરજીઓ માટે હજુ વધુ કાનૂની વિગતો આપવી પડી શકે છે.

આ કાનૂની વિવાદ સપ્ટેમ્બર 2025માં રાષ્ટ્રપતિની ઘોષણા સાથે શરૂ થયો હતો, જેમાં યુએસ બહારના કામદારો માટે $100,000ની નવી ફી ફરજિયાત બનાવવામાં આવી હતી અને બાદમાં તેની સમયમર્યાદા લંબાવવામાં આવી હતી. આ નિર્ણયને મેસેચ્યુસેટ્સ અને કેલિફોર્નિયાની ફેડરલ ડિસ્ટ્રિક્ટ કોર્ટમાં પડકારવામાં આવ્યો હતો. કોર્ટે આ નિર્ણયને રદ કરી ફી અમલીકરણ પર મનાઇહુકમ આપ્યો હતો, જેની સામે યુએસ સરકારે ઉપલી અપીલ કોર્ટમાં અરજી કરી છે.

આ મંજૂરીઓ મળવાના કારણે હવે અમેરિકી કંપનીઓ યુએસ બહાર રહેતા શ્રેષ્ઠ ઉમેદવારોની ભરતી પ્રક્રિયા પુનઃ શરૂ કરી શકશે. જે ભારતીય કે અન્ય વિદેશી કામદારો પાસે અગાઉથી જ માન્ય H-1B વિઝા સ્ટેમ્પ ઉપલબ્ધ છે, તેઓ નવા એમ્પ્લોયરની મંજૂર થયેલી અરજી આધારે નવી વિઝા એપોઇન્ટમેન્ટ લીધા વિના પણ તાત્કાલિક અમેરિકા પરત ફરી શકશે.

અગાઉ H-1B કેપ હેઠળ આવી ચૂકેલા અને 6 વર્ષની મહત્તમ મર્યાદામાંથી સમય બાકી હોય તેવા કામદારોએ ફરીથી લોટરી સિસ્ટમમાં જવું પડશે નહીં. છટણી કે સ્ટેટસમાં વિરામ બાદ સ્વદેશ પરત ફરેલા કુશળ ઇજનેરો માટે આ તક આશીર્વાદરૂપ સાબિત થશે. જોકે, વિદેશમાં રહેતા કામદારો સંપૂર્ણ મંજૂરી ન મળે ત્યાં સુધી H-1B પોર્ટેબિલિટી નિયમો હેઠળ કામ શરૂ કરી શકશે નહીં.

નિષ્ણાતોએ નોકરીદાતાઓને પ્રીમિયમ પ્રોસેસિંગ હેઠળ અટકેલી તમામ અરજીઓની તુરંત સમીક્ષા કરવા અને ઉમેદવારોના વિઝા સ્ટેમ્પ તથા ઇમિગ્રેશન ઇતિહાસ ચકાસીને ટ્રાવેલ પ્લાન ઘડવાની સલાહ આપી છે. જો ભવિષ્યમાં ઉપલી અપીલ કોર્ટ દ્વારા સ્ટે ઉઠાવી લેવામાં આવશે તો આ ફી પુનઃ લાગુ થઈ શકે છે, તેથી હાલના કાનૂની આદેશોનો લાભ લઈને પ્રક્રિયા પૂર્ણ કરવી હિતાવહ રહેશે.