લંડન:  બ્રિટિશ રાજવી પરિવારના વિવાદિત સભ્ય અને કિંગ ચાર્લ્સના નાના ભાઈ એન્ડ્રુ માઉન્ટબેટન-વિન્ડસર (ભૂતપૂર્વ પ્રિન્સ એન્ડ્રુ) ને જીવનું જોખમ ઊભું થયું હોય તેવી એક ઘટના સામે આવી છે. બુધવારે પૂર્વ ઇંગ્લેન્ડના વુલ્ફરટન ગામમાં, જ્યારે તેઓ પોતાના પાલતુ શ્વાનને ફેરવી રહ્યા હતા, ત્યારે એક અજાણ્યા શખ્સે તેમને અટકાવીને ધમકાવવાનો પ્રયાસ કર્યો હતો. આ ઘટનાને પગલે બ્રિટિશ પોલીસે ત્વરિત કાર્યવાહી કરીને આરોપીની ધરપકડ કરી લીધી છે.
નકાબપોશ શખ્સ અને ‘ઓફેન્સિવ’ હથિયાર
મીડિયા રિપોર્ટ્સ અનુસાર, આ હુમલાખોરે મોઢા પર માસ્ક (બાલાક્લાવા) પહેર્યું હતું. તેણે એન્ડ્રુની નજીક જઈને જોરશોરથી બૂમો પાડવાનું શરૂ કર્યું હતું અને તેમને ડરાવવાનો પ્રયાસ કર્યો હતો. જોકે, એન્ડ્રુની સાથે રહેલા સુરક્ષાકર્મીઓએ સતર્કતા દાખવી હતી અને તેઓ પોતાની કારમાં સુરક્ષિત રીતે ત્યાંથી નીકળી ગયા હતા. પોલીસે જણાવ્યું છે કે પકડાયેલા વ્યક્તિ પાસેથી ખતરનાક હથિયાર પણ મળી આવ્યું છે અને હાલ તેની પૂછપરછ ચાલી રહી છે.
વિવાદો અને એન્ડ્રુ માઉન્ટબેટન-વિન્ડસર
ઉલ્લેખનીય છે કે એન્ડ્રુ છેલ્લા લાંબા સમયથી વિવાદોના ઘેરામાં છે. ગત વર્ષે કિંગ ચાર્લ્સે તેમની પાસેથી તમામ શાહી ખિતાબો છીનવી લીધા હતા. એટલું જ નહીં, ફેબ્રુઆરી મહિનામાં તેમની ધરપકડ પણ કરવામાં આવી હતી. તેમના પર આરોપ છે કે તેમણે અમેરિકાના કુખ્યાત યૌન અપરાધી જેફરી એપસ્ટીનને સરકારી દસ્તાવેજો લીક કર્યા હતા. જોકે, એન્ડ્રુએ આ તમામ આરોપોને નકારી કાઢ્યા છે અને એપસ્ટીન સાથેની મિત્રતા બદલ ખેદ વ્યક્ત કર્યો છે.
રાજવી પરિવારની સુરક્ષામાં ક્ષતિ?
બ્રિટિશ મીડિયા આ ઘટનાને સુરક્ષામાં મોટી ક્ષતિ તરીકે જોઈ રહ્યું છે. જે રીતે એક સશસ્ત્ર વ્યક્તિ રાજવી પરિવારના સભ્યની આટલી નજીક પહોંચી ગઈ, તેણે સુરક્ષા એજન્સીઓના કાન ઉભા કરી દીધા છે. હાલમાં એન્ડ્રુ જેલમાં છે કે નજરકેદ, તે અંગે અટકળો ચાલી રહી છે, પરંતુ આ ઘટનાએ ફરી એકવાર માઉન્ટબેટન-વિન્ડસર પરિવારને ચર્ચામાં લાવી દીધો છે.