લખનૌ: ઉત્તર પ્રદેશમાં રાજકીય હલચલ વચ્ચે એક મોટા સમાચાર સામે આવ્યા છે. ઉત્તર પ્રદેશ કોંગ્રેસ કમિટીના અધ્યક્ષ અજય રાયની તબિયત અચાનક બગડતા તેમને તાત્કાલિક હોસ્પિટલમાં દાખલ કરવામાં આવ્યા છે. મળતી માહિતી મુજબ, અજય રાય અચાનક બેહોશ થઈને ઢળી પડ્યા હતા, જેના કારણે ત્યાં હાજર સમર્થકો અને પક્ષના કાર્યકરોમાં ભારે ગભરાટ ફેલાઈ ગયો હતો.
તબીબી તપાસમાં સ્થિતિ સામાન્ય
હોસ્પિટલમાં દાખલ કર્યા બાદ ડોક્ટરો દ્વારા તેમની વિવિધ તબીબી તપાસ કરવામાં આવી હતી. મેડિકલ રિપોર્ટ્સ અનુસાર, અજય રાયની સ્થિતિ હાલમાં સ્થિર છે અને ચિંતા જેવું કોઈ કારણ નથી. પ્રાથમિક તપાસમાં તેમના સ્વાસ્થ્યના તમામ માપદંડો સામાન્ય જણાતા કોંગ્રેસ છાવણીમાં રાહતનો શ્વાસ લેવાયો છે.
કાર્યકરોની હોસ્પિટલ બહાર ભીડ
અજય રાયના હોસ્પિટલમાં દાખલ થવાના સમાચાર વાયુવેગે પ્રસરતા મોટી સંખ્યામાં કોંગ્રેસના નેતાઓ અને કાર્યકરો હોસ્પિટલ પહોંચ્યા હતા. જોકે, ડોક્ટરોએ તેમને આરામ કરવાની સલાહ આપી છે. હાલમાં તેઓ મેડિકલ ઓબ્ઝર્વેશન હેઠળ છે અને જો બધું બરાબર રહેશે તો આગામી થોડા સમયમાં તેમને રજા આપી દેવામાં આવશે તેવું અનુમાન લગાડવામાં આવી રહ્યું છે.