લખનૌ :  અયોધ્યામાં રામલલાના ભવ્ય મંદિર નિર્માણ બાદ ઊભો થયેલો પ્રસાદ અને દાનની કથિત ચોરીનો વિવાદ ઉત્તર પ્રદેશના રાજકારણમાં ભારે ચર્ચામાં રહ્યો હતો. સમાજવાદી પાર્ટી અને કોંગ્રેસે આ મામલે આક્રમક વલણ અપનાવી વિધાનસભાથી લઈને ગલીઓ સુધી ભાજપને ઘેરવાની કોઈ તક છોડી નહોતી. મંદિર ટ્રસ્ટની પારદર્શિતા અને જવાબદારી પર સતત સવાલો ઊઠ્યા અને મામલો એટલો ગંભીર બન્યો કે લાંબા સમયથી રામ મંદિર આંદોલનનો ચહેરો રહેલા મહાસચિવ ચંપત રાય તથા ટ્રસ્ટી અનિલ મિશ્રાએ પોતાના પદ પરથી રાજીનામું આપવું પડ્યું. વિપક્ષ આ મુદ્દાને 2027ની વિધાનસભા ચૂંટણીમાં ભાજપની સૌથી મોટી સિદ્ધિ સામે ભ્રષ્ટાચારનું મોટું હથિયાર બનાવીને રજૂ કરવાની તૈયારીમાં હતો.

જોકે, આ મોટા રાજકીય ભૂકંપ વચ્ચે શ્રી રામ જન્મભૂમિ તીર્થ ક્ષેત્ર ટ્રસ્ટે એક એવો માસ્ટરસ્ટ્રોક લગાવ્યો છે જેણે વિપક્ષની રણનીતિની હવા કાઢી નાખી છે. દેશભરમાંથી આવેલા 5,585 ઉમેદવારોની આકરી ચકાસણી બાદ વાયુસેનાના નિવૃત્ત એર માર્શલ જિતેન્દ્ર મિશ્રાને ટ્રસ્ટના સૌપ્રથમ પૂર્ણકાલીન સીઈઓ (CEO) તરીકે નિયુક્ત કરવામાં આવ્યા છે. વેસ્ટર્ન એર કમાન્ડનું સફળ નેતૃત્વ કરી 'ઓપરેશન સિંદૂર'માં પોતાના પરાક્રમનો પરચો આપનાર જાંબાઝ સૈન્ય અધિકારીને વહીવટ સોંપીને ટ્રસ્ટે સાબિત કરી દીધું છે કે હવે મંદિરનું સંચાલન સંપૂર્ણ વ્યાવસાયિક, પારદર્શક અને લશ્કરી શિસ્તબદ્ધ ઢબે થશે.

આ નિમણૂકથી ઉત્તર પ્રદેશમાં 2027ની ચૂંટણી પૂર્વે હિન્દુત્વ અને રાષ્ટ્રવાદનું એક અભેદ્ય રાજકીય સમીકરણ રચાઈ ગયું છે. એક બાજુ વહીવટી પારદર્શિતા લાવીને ભ્રષ્ટાચારના આરોપો પર પૂર્ણવિરામ મૂકવાનો પ્રયાસ કરાયો છે, તો બીજી બાજુ દેશના શહીદો અને વીર સૈનિકોના સન્માન સાથે રામ મંદિરને જોડીને વિપક્ષ માટે જવાબી પ્રહારો કરવાનું મુશ્કેલ બનાવી દેવાયું છે. રામ મંદિરના ગર્ભગૃહથી શરૂ થયેલો આ વહીવટી સુધારો હવે સીધો રાજકીય દંગલમાં પરિવર્તિત થઈ ચૂક્યો છે, જ્યાં વિપક્ષી એકતા સામે રાષ્ટ્રવાદ અને ધર્મના સંગમનો પડકાર ઊભો છે.