બેંગલુરુ, તા. ૭ : કર્ણાટકના ખાદ્ય સુરક્ષા અને ઔષધ પ્રશાસનના ઔષધ અમલીકરણ વિભાગે અનેકલ અને દેવનહલ્લી ખાતે પરવાના વગર ચાલતાં બે સંગ્રહસ્થાનો ઉપર દરોડા પાડીને રૂ. ૪,૦૨,૩૫૨ની દવાઓનો જથ્થો કબજે કર્યો છે.

ગુપ્ત માહિતીના આધારે બંને સ્થળે એકસાથે કાર્યવાહી હાથ ધરવામાં આવી હતી. પ્રાથમિક તપાસમાં દવાઓ ઓનલાઈન માધ્યમથી વેચાણ કરવા માટે સંગ્રહવામાં આવી હોવાનું અને સંબંધિત સ્થળો પાસે જરૂરી ઔષધ વેચાણ કે સંગ્રહ પરવાનો ન હોવાનું સામે આવ્યું છે.

દવાઓની ખરીદી ક્યાંથી થઈ, તેનું વિતરણ કયા વિસ્તારોમાં થતું હતું અને ગ્રાહકોને પ્રિસ્ક્રિપ્શન વગર દવા અપાતી હતી કે કેમ તેની તપાસ ચાલુ છે. દવાઓની ગુણવત્તા અને દસ્તાવેજોની પણ ચકાસણી કરવામાં આવશે. નિયમોનું ઉલ્લંઘન સાબિત થશે તો સંબંધિત સંચાલકો સામે ઔષધ કાયદા હેઠળ કાર્યવાહી કરાશે.