મુંબઈ: મુંબઈની લાઈફલાઈન ગણાતી લોકલ ટ્રેનોમાં અવારનવાર રસપ્રદ દ્રશ્યો જોવા મળતાં હોય છે, પરંતુ કૃષ્ણ જન્માષ્ટમીના પાવન પર્વ નિમિત્તે બદલાપુરથી ઠાણે જતી લોકલ ટ્રેનમાં એક અત્યંત ચોંકાવનારો અને ઉત્સાહવર્ધક કિસ્સો સામે આવ્યો છે. ટ્રેનના લેડીઝ કમ્પાર્ટમેન્ટમાં મહિલા મુસાફરોના એક જૂથે ચાલુ ટ્રેનની અંદર જ પારંપરિક દહીં હાંડી ઉત્સવની ઉજવણી કરી હતી. સવારના વ્યસ્ત સમયે ટ્રેનના ડબ્બામાં રચાયેલા આ અનોખા ઉત્સવનો વિડીયો સોશિયલ મીડિયા પર વાયરલ થતાં ભારે આકર્ષણ જમાવ્યું છે. આ ઘટના ગુરુવારે સવારે આશરે ૭:૫૬ વાગ્યે બદલાપુરથી ઉપડેલી લોકલ ટ્રેનમાં બની હતી.

વાયરલ થયેલા વિડીયો અનુસાર, મહિલાઓએ કમ્પાર્ટમેન્ટના ઓવરહેડ હેન્ડલ સાથે માટીની હાંડી લટકાવી હતી. ત્યારબાદ પારંપરિક ગોવિંદા મંડળોની તર્જ પર મહિલાઓએ ચાલુ ટ્રેને બે માળનું નાનું માનવ પિરામિડ બનાવવાનો નિર્ણય કર્યો હતો. ડબ્બામાં રહેલાં એક વયસ્ક મહિલા નીચે આધાર આપીને ઊભા રહ્યા હતા અને તેમની ઉપર એક યુવતી ચડીને લટકાવેલી હાંડી સુધી પહોંચી હતી. પરસ્પર તાલમેલ અને કૌશલ્ય સાથે યુવતીએ સફળતાપૂર્વક હાંડી ફોડતાં જ આખા કમ્પાર્ટમેન્ટમાં તાળીઓના ગડગડાટ સાથે ખુશીની લહેર દોડી ગઈ હતી.

હાંડી ફૂટ્યા બાદ ડબ્બામાં હાજર અન્ય મહિલા મુસાફરો પણ ગરબે ઘૂમીને અને નાચીને આ ઉત્સવના આનંદમાં સહભાગી થઈ હતી. એક તરફ ટ્રેન પોતાની પૂરઝડપે ગંતવ્ય તરફ વધી રહી હતી ત્યારે બીજી તરફ ટ્રેનનો ડબ્બો સાંસ્કૃતિક મહોત્સવનું રૂપ ધારણ કરી ચૂક્યો હતો. સોશિયલ મીડિયા પર આ વિડીયો વાયરલ થયા બાદ યુઝર્સ તરફથી મિશ્ર પ્રતિસાદ સાંપડ્યો છે. અનેક લોકોએ મહિલાઓના જુસ્સા અને પર્વ ઉજવવાની રીતના વખાણ કર્યા છે, તો બીજી તરફ કેટલાક લોકોએ ચાલુ ટ્રેને આવા જોખમી સ્ટંટ કરવા સામે ચિંતા પણ વ્યક્ત કરી છે.