ઈન્દોર, તા.૨૪: મધ્યપ્રદેશના સંસ્કારી અને સ્વચ્છ શહેર ઈન્દોરમાં ગણેશોત્સવ દરમિયાન એક અત્યંત અનોખી અને કલ્પનાશીલ ગણેશ ઝાંખી જોવા મળી રહી છે, જે શ્રદ્ધાળુઓ માટે આકર્ષણનું કેન્દ્ર બની છે. એમ.જી. રોડ પર 'આરોગ્ય મેડિકલ'ના સ્થાપકો વિશાલ અને રુચિ જોશી દ્વારા તૈયાર કરવામાં આવેલી આ ઝાંખીમાં ભગવાન ગણેશની દિનચર્યાને આધુનિક શૈલીમાં રજૂ કરવામાં આવી છે. આ કલાત્મક સજાવટમાં બાપ્પાને પલંગ પર આરામથી ટીવી જોતા, ડ્રોઈંગ રૂમમાં પિતા શિવજી, માતા પાર્વતી અને ભાઈ કાર્તિકેય સાથે ચા પીતા, રસોડામાં પરિવાર સાથે ભોજન લેતા અને જિમમાં ટ્રેડમિલ પર વર્કઆઉટ કરતા દર્શાવવામાં આવ્યા છે.

આ સર્જનાત્મક ઝાંખીનો મુખ્ય ઉદ્દેશ્ય લોકોને ફિટનેસ, શિસ્ત, પારિવારિક બંધન અને સ્વસ્થ જીવનશૈલીનો સંદેશ આપવાનો છે. આ ઘર જેવા સેટઅપ ઉપરાંત, ઝાંખીમાં ઈન્દોર શહેરની ઐતિહાસિક અને આધુનિક વિકાસયાત્રાને પણ કાગળ અને અન્ય મટીરિયલ્સના મોડેલ્સ દ્વારા ખૂબ જ સુંદર રીતે કંડારવામાં આવી છે. જેમાં જૂના સમયના બળદગાડાથી લઈને આધુનિક મેટ્રો ટ્રેન, રાજવાડા પેલેસ, ઈન્દોર મ્યુનિસિપલ કોર્પોરેશન, સફાઈ કર્મચારીઓ તેમજ આઈડીએ બિલ્ડિંગ જેવા સ્થાનિક મહત્વના સ્થળોનો સમાવેશ થાય છે.

આ અદ્ભુત ગણેશ ઝાંખી તૈયાર કરતા અઢી મહિના જેટલો લાંબો સમય લાગ્યો હતો. જેમાં લાઇટિંગ, પ્લાસ્ટર ઓફ પેરિસ, પેઇન્ટિંગ અને ઝુમ્મર કામ માટે સાતથી આઠ અલગ-અલગ એજન્સીઓ તેમજ કેશવ, મોહિત અને વિશાલની ટીમે રાત-દિવસ એક કરીને યોગદાન આપ્યું છે. આધ્યાત્મિકતા, સામાજિક સંદેશ અને આધુનિકતાનો આ ત્રિવેણી સંગમ ઈન્દોરના ગણેશોત્સવમાં લોકો માટે કૌતુક અને પ્રશંસાનો વિષય બન્યો છે.