ઢાકા:   બાંગ્લાદેશમાં ઈદ અલ-અધા એટલે કે બકરીદ પૂર્વે પશુ બજારમાં એક અત્યંત વિચિત્ર અને રમુજી માહોલ જોવા મળી રહ્યો છે. ઢાકા નજીક નારાયણગંજના એક કેટલ ફાર્મમાં બે વિશાળકાય આલ્બીનો ભેંસો આકર્ષણનું કેન્દ્ર બની છે, જેમના નામ અમેરિકી પ્રમુખ ડોનાલ્ડ ટ્રમ્પ અને ઈઝરાયેલના વડાપ્રધાન બેન્જામિન નેતન્યાહૂના નામ પર રાખવામાં આવ્યા છે. આ વિચિત્ર નામકરણને કારણે આ પશુ બજાર હવે માત્ર સ્થાનિક જ નહીં પણ આંતરરાષ્ટ્રીય સ્તરે મજાક અને ચર્ચાનો વિષય બની ગયું છે. સોશિયલ મીડિયા પર આ પશુઓના વીડિયો વાયરલ થતા જ હજારોની ભીડ તેમને જોવા માટે ઉમટી પડી છે.

આ અનોખા નામકરણ પાછળ ભેંસોના સ્વભાવ અને દેખાવ જવાબદાર હોવાનું માલિકોનું કહેવું છે. લગભગ 700 કિલોની 'ડોનાલ્ડ ટ્રમ્પ' નામની ભેંસ તેના સોનેરી વાળ અને શાંત સ્વભાવ માટે જાણીતી છે, જેને તેના માલિકે ₹550 પ્રતિ કિલોના ભાવે વેચી પણ દીધી છે. બીજી તરફ, 'બેન્જામિન નેતન્યાહૂ' નામની ભેંસ તેના આક્રમક તેવર માટે ચર્ચામાં છે. 750 કિલોથી વધુ વજન ધરાવતી આ ભેંસ એટલી તોફાની છે કે કોઈ તેને ખવડાવવા જાય તો તે શિંગડા ઉલાળીને હુમલો કરવા દોડે છે. માલિકોનો તર્ક છે કે નેતન્યાહૂના આક્રમક વલણને કારણે જ આ જટિલ સ્વભાવની ભેંસને આ નામ આપવામાં આવ્યું છે.

આ બજારમાં માત્ર આ બે જ નહીં પણ કુલ છ આલ્બીનો ભેંસો છે, જેમના સફેદ-ગુલાબી દેખાવને કારણે લોકો તેમને જોવા માટે દૂર-દૂરથી આવી રહ્યા છે. આ પશુઓને ઈદના દિવસે કુરબાન કરવા માટે ઉદારતાથી ખવડાવીને તૈયાર કરવામાં આવી રહ્યા છે. રાજકીય નેતાઓના નામનો પશુઓ માટે ઉપયોગ કરવો એ કદાચ વિવાદાસ્પદ હોઈ શકે, પરંતુ બાંગ્લાદેશી બજારમાં આ 'માર્કેટિંગ ગિમિક' સુપરહિટ સાબિત થઈ છે. હવે લોકો એ જોવાની રાહ જોઈ રહ્યા છે કે આ હાઈ-પ્રોફાઈલ નામો વાળા પશુઓની કુરબાની બાદ આંતરરાષ્ટ્રીય સ્તરે કેવા પ્રતિભાવો મળે છે.