અમદાવાદ : કેન્દ્રીય ગૃહ અને સહકાર મંત્રી અમિતભાઈ શાહ બે દિવસીય વતન ગુજરાતના પ્રવાસે આવી પહોંચ્યા છે. પશ્ચિમ બંગાળ વિધાનસભા ચૂંટણીઓ પૂર્ણ થયા બાદ તેઓ પ્રથમ વખત ગુજરાત આવ્યા છે. પ્રવાસના પ્રથમ દિવસે જ તેમણે પર્યાવરણની જાળવણી અને ઈંધણનો ખોટો વ્યય અટકાવવાના ઉદ્દેશ્ય સાથે પોતાના સુરક્ષા કાફલાની ગાડીઓની સંખ્યામાં નોંધપાત્ર ઘટાડો કરીને એક પ્રેરણાદાયી પહેલ કરી હતી. આ ઉપરાંત, શહેરમાં સામાન્ય જનતા માટે ટ્રાફિકની સમસ્યા ન સર્જાય તે માટે તેમણે અલગ-અલગ સરકારી કચેરીઓએ જવાને બદલે અમદાવાદના બોડકદેવ ખાતે આવેલી દક્ષિણ પશ્ચિમ ઝોન ઓફિસને જ મુખ્ય વહીવટી કેન્દ્ર બનાવ્યું હતું. આ એક જ સ્થળેથી તેમણે ક્રમશઃ ૪ મહત્વની ઉચ્ચસ્તરીય સમીક્ષા બેઠકો યોજીને વિવિધ વિકાસલક્ષી કાર્યોનું મૂલ્યાંકન કર્યું હતું.

ઉચ્ચ મંત્રીમંડળ અને ટોચના વહીવટી અધિકારીઓની પ્રેરક ઉપસ્થિતિ:
બોડકદેવ ખાતે યોજાયેલી આ હાઈ-પ્રોફાઈલ સમીક્ષા બેઠકોમાં રાજ્યના ગૃહ રાજ્યમંત્રી અને નાયબ મુખ્યમંત્રી હર્ષભાઈ સંઘવી, આરોગ્ય મંત્રી પ્રફુલભાઈ પાનસેરીયા, ચીફ સેક્રેટરી એમ.કે. દાસ, અગ્ર સચિવ અશ્વિની કુમાર, અમદાવાદ મ્યુનિસિપલ કમિશનર બંચાનીધી પાની, ગાંધીનગર મ્યુનિસિપલ કમિશનર જે.એસ. પ્રજાપતિ, કલેક્ટર ભવ્ય વર્મા અને ડીઆરએમ વેદ પ્રકાશ સહિતના ઉચ્ચ અધિકારીઓ હાજર રહ્યા હતા.

ગ્રીન લોકસભા અભિયાન, વૃક્ષારોપણ અને જળ સંચય પર મંથન:
પ્રથમ બેઠક દરમિયાન અમિતભાઈ શાહે ગાંધીનગર સંસદીય મતવિસ્તારમાં ચાલી રહેલા ‘ગ્રીન લોકસભા-હરિયાળી લોકસભા’ અભિયાનની પ્રગતિની ઝીણવટભરી સમીક્ષા કરી હતી. આગામી ચોમાસાની ઋતુ દરમિયાન વરસાદી પાણીના સંગ્રહ માટે લોકસભા વિસ્તારના વિવિધ તળાવોની ક્ષમતા વધારવા અને તેમના જીર્ણોદ્ધારની કામગીરી પર ભાર મૂકવામાં આવ્યો હતો. આ બેઠકમાં પર્યાવરણની જાળવણી માટે મોટા પાયે વૃક્ષારોપણના લક્ષ્યાંકો નક્કી કરાયા હતા. આ શ્રૃંખલાની ત્રીજી બેઠકમાં પણ સંપૂર્ણપણે જળ સંચય અને વોટર મેનેજમેન્ટ પર ધ્યાન કેન્દ્રિત કરવામાં આવ્યું હતું, જેમાં ભૂગર્ભ જળના સ્તર ઊંચા લાવવા માટે અમદાવાદ અને ગાંધીનગર કોર્પોરેશનના તળાવોને એકબીજા સાથે ઇન્ટરલિંક કરવા તેમજ ઊંડા કરવા અંગે વ્યૂહાત્મક આયોજન કરાયું હતું.

ગાંધીનગર-સરખેજ હાઇવેનું આધુનિકીકરણ અને ટ્રાફિક સમસ્યાનું નિવારણ:
બીજી મહત્વની બેઠકમાં ગાંધીનગર-સરખેજ હાઇવે (એસ.જી. હાઇવે) ના આધુનિકીકરણની વિસ્તૃત સમીક્ષા અધિકારીઓ સાથે કરવામાં આવી હતી. આ માર્ગ પર વાહનોના ભારણને કારણે સર્જાતી ટ્રાફિક અને પાર્કિંગની જટિલ સમસ્યાઓના કાયમી ઉકેલ લાવવા માટે મંથન કરાયું હતું. ખાસ કરીને એસ.જી. હાઇવેને સંપૂર્ણપણે ‘ડસ્ટ ફ્રી હાઈવે’ બનાવવા માટેની આગામી યોજનાઓ ઘડી કઢાઈ હતી અને કર્ણાવતી જંક્શનથી લઈને સરખેજ બ્રિજ સુધી ચાલી રહેલા બાંધકામની ભૌતિક પ્રગતિનો ચિતાર મેળવ્યો હતો.

GUDC હેઠળ વિકાસ કાર્યો અને માણસાની સાર્વજનિક હોસ્પિટલની સમીક્ષા:
ચોથી અને અંતિમ બેઠકમાં ગુજરાત અર્બન ડેવલપમેન્ટ કંપની (GUDC) હેઠળ ગાંધીનગર લોકસભા વિસ્તારમાં પ્રગતિ હેઠળ રહેલા વિવિધ વિકાસલક્ષી કાર્યોની સમીક્ષા કરવામાં આવી હતી. આ બેઠકમાં મુખ્યત્વે માણસા નગરપાલિકા વિસ્તાર સંબંધિત લોકહિતના કાર્યો પર ચર્ચા થઈ હતી. આરોગ્ય મંત્રી પ્રફુલભાઈ પાનસેરીયાની પ્રત્યક્ષ ઉપસ્થિતિમાં માણસાની સાર્વજનિક હોસ્પિટલની કામગીરીની પ્રગતિ તેમજ ત્યાં આરોગ્ય વિષયક સુવિધાઓ વધુ સુદ્રઢ બનાવવા અંગે જરૂરી વહીવટી સૂચનાઓ આપવામાં આવી હતી.