લખનૌ : ઉત્તર પ્રદેશમાં વિધાનસભા ચૂંટણીના હવે ગણતરીના મહિનાઓ જ બાકી રહ્યા છે, ત્યારે રાજ્યના રાજકારણમાં સમાન નાગરિક સંહિતા (UCC) નો મુદ્દો સપાટી પર આવ્યો છે. કેન્દ્રીય ગૃહમંત્રી અમિતભાઈ શાહે ૧૩ સપ્ટેમ્બરે મુંબઈ ખાતે એવી જાહેરાત કરી હતી કે વર્ષ ૨૦૨૯ની લોકસભા ચૂંટણી પહેલાં ભાજપ શાસિત અને NDA ના તમામ ૨૧ રાજ્યોમાં UCC અમલી બનાવી દેવાશે. આ જાહેરાત બાદ ઉત્તર પ્રદેશમાં રાજકીય પારો ઊંચકાઈ ગયો છે અને ચર્ચાનો દોર શરૂ થયો છે કે યોગી આદિત્યનાથ સરકાર ૨૦૨૭ની ચૂંટણી પહેલાં જ આ બિલ પસાર કરશે કે તેને ચૂંટણી પ્રચારના મુખ્ય શસ્ત્ર તરીકે ઉપયોગમાં લેશે.

અયોધ્યામાં રામ મંદિર નિર્માણ અને કલમ ૩૭૦ નાબૂદી બાદ UCC એ ભાજપના વૈચારિક એજન્ડાનો મુખ્ય ભાગ રહ્યો છે. યુપી ભાજપના મુખ્ય પ્રવક્તા દિનેશ પ્રતાપ સિંહે સ્પષ્ટ કર્યું છે કે પક્ષ પોતાના સંકલ્પ પત્રના વચન મુજબ રાજ્યમાં પણ આ દિશામાં નક્કર પગલાં ભરશે. જોકે, ઉત્તર પ્રદેશ જેવા અત્યંત મોટા અને ધાર્મિક-સામાજિક વિવિધતા ધરાવતા રાજ્યમાં લગ્ન, છૂટાછેડા, વારસાઈ અને દત્તક જેવા સંવેદનશીલ કાયદાઓ માટે ડ્રાફ્ટ તૈયાર કરવો અને પરામર્શ કરવો એ એક મોટો પડકાર છે. રાજ્ય કાયદા પંચના સૂત્રો મુજબ હજી સુધી યોગી સરકારે ડ્રાફ્ટ તૈયાર કરવા કોઈ અધિકૃત વિનંતી મોકલી નથી, જેના કારણે ચૂંટણી પહેલાં કાયદો બનવા અંગે અનિશ્ચિતતા સેવાઈ રહી છે.

સાથી પક્ષોમાં અસમંજસ અને વિપક્ષનો આકરો પ્રહાર

UCC ના પ્રવેશથી NDA ના સ્થાનિક સાથી પક્ષો જેવા કે RLD, અપના દળ (S) અને એસબીએસપી (SBSP) માટે પણ ધર્મસંકટ ઊભું થયું છે. આ પક્ષોનો વોટબેંક પાયો ખાસ કરીને અલગ-અલગ જાતિઓ અને રિવાજો ધરાવતા લોકો પર ટકેલો છે, તેથી તેઓ આ વિષય પર ખુલીને બોલવાનું ટાળી રહ્યા છે.

બીજી તરફ, સમાજવાદી પાર્ટીના અધ્યક્ષ અખિલેશ યાદવે સોશિયલ મીડિયા પર આક્રમક પ્રહાર કરતા UCC ને ભાજપનું "ભૂગર્ભ કોમી કાવતરું" ગણાવ્યું છે. તેમણે દાવો કર્યો હતો કે સરકાર મોંઘવારી, બેરોજગારી અને ખેડૂતોના મૂળભૂત પ્રશ્નો પરથી જનતાનું ધ્યાન હટાવવા માટે જ ચૂંટણી ટાણે આવા વિવાદિત કાયદાની વાતો કરી રહી છે. આમ, યુપીની આગામી ચૂંટણીમાં હિન્દુત્વ, જ્ઞાતિગત સમીકરણો અને રોજગારની સાથે હવે સમાન નાગરિક સંહિતા પણ એક મોટો સંઘર્ષનો મુદ્દો બનવા જઈ રહ્યો છે.