નવી દિલ્હી, તા.29: ભારતીય જનતા પાર્ટીના વરિષ્ઠ નેતા અને પૂર્વ કેન્દ્રીય મંત્રી સૈયદ શાહનવાઝ હુસૈનના પુત્ર સૈયદ અરબાઝ હુસૈનના લગ્ન તાજેતરમાં નવી દિલ્હીના ચાણક્યપુરી ખાતે હર્ષોલ્લાસ સાથે સંપન્ન થયા હતા. આ ભવ્ય લગ્ન સમારોહ અને ત્યારબાદ યોજાયેલા રિસેપ્શનમાં દેશભરમાંથી શાસક અને વિપક્ષ બંને પક્ષોના અનેક અગ્રણી રાજકીય નેતાઓએ હાજરી આપી નવદંપતીને આશીર્વાદ પાઠવ્યા હતા, પરંતુ આ પ્રસંગે ભાજપના જ દિગ્ગજ નેતા ઉમા ભારતી દ્વારા સોશિયલ મીડિયા પર શેર કરવામાં આવેલી એક ભાવનાત્મક પત્ર-પોસ્ટે ભારે ચર્ચા જગાવી છે.

પ્રાપ્ત વિગતો અનુસાર, શાહનવાઝ હુસૈનના પુત્ર અરબાઝના લગ્ન હરિયાણાના જગધરીથી કોંગ્રેસના ધારાસભ્ય અને પૂર્વ મંત્રી મોહમ્મદ અકરમ ખાનની પુત્રી અફશાન અકરમ ખાન સાથે થયા છે. આ ખુશીના અવસર પર ભાજપના વરિષ્ઠ નેતા ઉમા ભારતીએ પોતાના સોશિયલ મીડિયા હેન્ડલ પર એક લાંબી અને હૃદયસ્પર્શી પોસ્ટ શેર કરી હતી, જેમાં તેમણે શાહનવાઝ હુસૈન સાથેના છેલ્લાં ૩૨ વર્ષના ગાઢ કૌટુંબિક અને રાજકીય સંબંધોની યાદો તાજી કરી હતી.

પોતાની ભાવનાત્મક પોસ્ટમાં ઉમા ભારતીએ વર્ષ ૧૯૯૩ના સમયને યાદ કરતા લખ્યું હતું કે જ્યારે તેઓ યુવા મોરચાના અધ્યક્ષ બન્યા ત્યારે શાહનવાઝ હુસૈન તેમની ટીમનો હિસ્સો હતા. તે સમયે અયોધ્યા આંદોલનમાં સક્રિય ભૂમિકા ભજવવાના કારણે ડાબેરીઓ દ્વારા તેમના જેવા નેતાઓને મુસ્લિમ સમુદાયના વિરોધી તરીકે ચિત્રિત કરવામાં આવતા હતા, છતાં શાહનવાઝે પોતાની સક્રિયતા અને કર્તવ્યનિષ્ઠાથી પક્ષમાં મોટું સ્થાન મેળવ્યું અને માત્ર ૩૨ વર્ષની વયે અટલ બિહારી વાજપેયીની સરકારમાં કેબિનેટ મંત્રી બન્યા હતા.

ઉમા ભારતીએ પોતાના સંસ્મરણો વાગોળતા એવું પણ જણાવ્યું કે શાહનવાઝ હુસૈનના અંગત જીવન અને લગ્ન જીવન સાથે પણ તેઓ શરૂઆતથી જોડાયેલા રહ્યા છે અને અરબાઝના જન્મ પર તેમણે પોતાના નિવાસસ્થાને ખાસ ઉજવણી પણ કરી હતી. જોકે, કેદારનાથના પ્રવાસ દરમિયાન અત્યંત ઠંડીના કારણે તબિયત લથડવા અને હવામાનની પ્રતિકૂળતાના કારણે તેઓ દિલ્હી ખાતે યોજાયેલા આ લગ્ન સમારોહમાં પ્રત્યક્ષ ઉપસ્થિત રહી શક્યા નહોતા, જેનો તેમને જીવનભર અફસોસ રહેશે તેમ તેમણે ઉમેર્યું હતું.

આ ભાવનાત્મક પોસ્ટના પ્રતિસાદરૂપે પૂર્વ કેન્દ્રીય મંત્રી શાહનવાઝ હુસૈને પણ અત્યંત લાગણીશીલ પ્રત્યુત્તર આપતા જણાવ્યું હતું કે દીદીના આશીર્વાદ અને માર્ગદર્શન તેમના પરિવાર માટે અમૂલ્ય છે અને ૩૨ વર્ષનો આ સાથ તેમના જીવનની સૌથી મોટી મૂડી છે. તેમણે ઉમા ભારતીને દિલ્હી પધારવા અને નવદંપતીને રૂબરૂ આશીર્વાદ આપવા માટે પણ હાર્દિક નિમંત્રણ પાઠવ્યું હતું.

આ રાજકીય સીમાઓથી પરેના પારિવારિક અને સ્નેહપૂર્ણ સંબંધોની આ કહાની હાલ સોશિયલ મીડિયા પર ભારે વાયરલ થઈ રહી છે અને રાજકીય વર્તુળોમાં આ પરસ્પર આદર અને ભાઈચારાની વ્યાપક પ્રશંસા થઈ રહી છે.