નોવોરોસિયસ્ક: યુક્રેનિયન નૌકાદળે કાળા સમુદ્રમાં એક અત્યંત શક્તિશાળી અને પ્રતીકાત્મક સૈન્ય હુમલો કરીને રશિયાની ફેડરલ સિક્યુરિટી સર્વિસના સરહદ પેટ્રોલિંગ જહાજ 'ઇઝુમરુદ'  ને સમુદ્રના તળિયે મોકલી દીધું છે. આ હુમલા માટે યુક્રેને પોતાની અત્યાધુનિક સ્વદેશી ટેકનોલોજીથી બનેલા 'સરગન-3000'  દરિયાઈ ડ્રોનનો ઉપયોગ કર્યો હતો. હુમલો એટલો પ્રચંડ હતો કે જહાજની જમણી બાજુ  પર મોટો વિસ્ફોટ થયો હતો અને સેટેલાઇટ તસવીરોમાં જહાજના બે ટુકડા થઈ ગયા હોવાનું સ્પષ્ટ દેખાય છે. આ ઓપરેશનમાં રશિયન ક્રૂ મેમ્બર્સના મોત થયાની સત્તાવાર પુષ્ટિ થઈ છે.

આ હુમલો યુક્રેન માટે માત્ર સૈન્ય સફળતા નથી, પરંતુ સાડા સાત વર્ષ જૂનો એક મોટો બદલો છે. વર્ષ 2018માં કેર્ચની ખાડીમાં આ જ 'ઇઝુમરુદ' જહાજે યુક્રેનના ત્રણ નાના નૌકાદળના જહાજો પર ગોળીબાર કરીને તેમને જપ્ત કર્યા હતા અને 24 યુક્રેનિયન ખલાસીઓને કેદ કરી લીધા હતા. એ સમયે રશિયાએ આ ઘટનાને પોતાની મોટી જીત ગણાવી હતી. હવે બરાબર સાડા સાત વર્ષ પછી યુક્રેનિયન નૌકાદળે એ જ જહાજને નિશાન બનાવીને રશિયાને નૌકાદળના ઇતિહાસનો સૌથી શરમજનક ઘા આપ્યો છે અને જાહેર કર્યું છે કે "બદલો અનિવાર્ય હતો."

આ ઘટના દર્શાવે છે કે રશિયા-યુક્રેન યુદ્ધ હવે સમુદ્રના મોરચે સંપૂર્ણપણે બદલાઈ ગયું છે. યુક્રેન પાસે કોઈ પરંપરાગત મોટી નેવી ન હોવા છતાં, તેના રિમોટ-કંટ્રોલ આત્મઘાતી દરિયાઈ ડ્રોન્સે રશિયાના અબજો ડોલરના બ્લેક સી ફ્લીટને પીછેહઠ કરવા મજબૂર કરી દીધું છે. સંરક્ષણ નિષ્ણાતોના મતે, યુક્રેનની આ વધતી જતી મેરીટાઇમ ક્ષમતા કાળા સમુદ્રમાં રશિયાના પ્રભુત્વને સંપૂર્ણપણે ખતમ કરી રહી છે અને આગામી દિવસોમાં રશિયન નૌકાદળ પર આવા વધુ ઘાતક હુમલા થવાની પૂરી સંભાવના છે.