મોસ્કો : યુક્રેન સાથેના યુદ્ધ વચ્ચે રશિયા હવે ઈંધણ સંકટનો સામનો કરી રહ્યું છે. યુક્રેનના સતત ડ્રોન હુમલાના કારણે રશિયાની અનેક ઓઈલ રિફાઈનરીઓને ભારે નુકસાન થયું છે, જેના પગલે મોસ્કોએ પડોશી દેશ કઝાકિસ્તાન પાસે ઈમરજન્સી પેટ્રોલ-ડીઝલની મદદ માંગી છે.

રોઈટર્સના અહેવાલ મુજબ, મે અને જૂન 2026 દરમિયાન યુક્રેને રશિયાની 15 થી વધુ મોટી ઓઈલ રિફાઈનરીઓને ડ્રોન હુમલાથી નિશાન બનાવી છે. રિયાઝાન, વોલ્ગોગ્રાડ અને ક્રાસ્નોદર સ્થિત રિફાઈનરીઓને સૌથી વધુ નુકસાન થયું છે. આ હુમલાઓના કારણે રશિયાનું તેલ શુદ્ધિકરણ ઉત્પાદન 17% જેટલું ઘટી ગયું છે.

ઘરેલુ બજારમાં પેટ્રોલ અને ડીઝલની અછત સર્જાતા રશિયન સરકારે 1 માર્ચથી પેટ્રોલની નિકાસ પર 6 મહિના માટે પ્રતિબંધ લગાવ્યો હતો. હવે પરિસ્થિતિ વધુ વણસતા રશિયાના ઉર્જા મંત્રાલયે કઝાકિસ્તાન સરકારને પત્ર લખીને 1 લાખ ટન AI-92 ગ્રેડ પેટ્રોલનો ઈમરજન્સી સ્ટોક ઉપલબ્ધ કરાવવા વિનંતી કરી છે.

આ સ્થિતિ વિડંબનારૂપ છે કારણ કે રશિયા વિશ્વનો ત્રીજો સૌથી મોટો તેલ ઉત્પાદક દેશ છે અને ભારત સહિત અનેક દેશોને મોટા પાયે ક્રૂડ ઓઈલ સપ્લાય કરે છે. 2025-26 માં ભારતે રશિયા પાસેથી દરરોજ 17 લાખ બેરલ ક્રૂડ ઓઈલની આયાત કરી હતી. જોકે, ક્રૂડ ઓઈલ અને રિફાઈન્ડ પેટ્રોલ-ડીઝલ અલગ વસ્તુ છે. રશિયા પાસે ક્રૂડ છે પણ તેને રિફાઈન કરીને પેટ્રોલ બનાવતી રિફાઈનરીઓ જ હુમલામાં ધ્વસ્ત થઈ છે.

ઉર્જા નિષ્ણાતોનું માનવું છે કે જો રશિયાનું ઈંધણ સંકટ લાંબુ ચાલશે તો તેની અસર આંતરરાષ્ટ્રીય બજારમાં ક્રૂડ અને પેટ્રોલિયમ પ્રોડક્ટના ભાવ પર પડી શકે છે. કઝાકિસ્તાને હજુ સુધી રશિયાની માંગ પર કોઈ સત્તાવાર જવાબ આપ્યો નથી.