નવી દિલ્હી : ભારતીય વિશિષ્ટ ઓળખ સત્તામંડળ (UIDAI) એ આધાર કાર્ડ ધારકો માટે એક મોટી રાહત આપતી નવી ટેકનોલોજી અમલી બનાવી છે. અત્યાર સુધી આધાર કાર્ડ ડાઉનલોડ કરવા કે કોઈ પણ સુધારા માટે રજિસ્ટર્ડ મોબાઈલ નંબર પર આવતો OTP અનિવાર્ય હતો, પરંતુ હવે 'ફેસ ઓથેન્ટિકેશન' ફીચર દ્વારા યુઝર્સ માત્ર પોતાનો ચહેરો સ્કેન કરીને આધાર કાર્ડની ડિજિટલ નકલ મેળવી શકશે. જે લોકોના મોબાઈલ નંબર અપડેટ નથી અથવા જૂના નંબર બંધ થઈ ગયા છે, તેમના માટે આ સુવિધા આશીર્વાદરૂપ સાબિત થશે. યુઝર્સે માત્ર 'MyAadhaar' એપમાં જઈને કેમેરા સામે ચહેરો બતાવવાનો રહેશે અને સિસ્ટમ ડેટા મેચ થતાની સાથે જ PDF ફાઈલ ડાઉનલોડ થઈ જશે.

ડિજિટલ પદ્ધતિ ઉપરાંત, UIDAI એ ફિઝિકલ PVC આધાર કાર્ડનો વિકલ્પ પણ વધુ સરળ બનાવ્યો છે. યુઝર્સ સત્તાવાર વેબસાઇટ પર જઈને ઓર્ડર આપી શકે છે, જે થોડા જ દિવસોમાં સીધા ઘરના સરનામે પહોંચી જાય છે. આ કાર્ડ તમામ સરકારી અને ખાનગી કામોમાં માન્ય ગણાય છે. જો કોઈ વ્યક્તિએ પોતાના આધારમાં નામ, સરનામું કે જન્મ તારીખ જેવી વિગતો સુધારવી હોય, તો તે માટે 75 થી 100 રૂપિયા સુધીની ફી નિર્ધારિત કરવામાં આવી છે. ઓનલાઈન એપ્લિકેશન અથવા નજીકના આધાર સેવા કેન્દ્ર પર જઈને આ સુધારો કરાવી શકાય છે, જે સંપૂર્ણપણે સુરક્ષિત પ્રક્રિયા છે.

આ નવીનતમ અપડેટનો મુખ્ય હેતુ છેવાડાના માનવી સુધી ડિજિટલ સેવાઓ પહોંચાડવાનો અને OTP પરની નિર્ભરતા ઘટાડવાનો છે. ટેકનોલોજીના આ બદલાવથી છેતરપિંડીના કિસ્સાઓમાં પણ ઘટાડો થશે, કારણ કે ફેસ ઓથેન્ટિકેશન વ્યક્તિની વાસ્તવિક હાજરીની ખાતરી કરે છે. UIDAI દ્વારા લેવામાં આવેલ આ પગલું ડિજિટલ ઈન્ડિયાના અભિયાનને વધુ વેગ આપશે અને નાગરિકોને વારંવાર આધાર કેન્દ્રોના ધક્કા ખાવામાંથી મુક્તિ અપાવશે. હવે યુઝર્સ ગમે ત્યારે અને ગમે ત્યાંથી વગર કોઈ ફોન મેસેજની રાહ જોયે પોતાની ઓળખ સ્થાપિત કરી શકશે.