ચેન્નાઈ, તા. ૧૨: તમિલનાડુના રાજકારણમાં એકવાર ફરી 'સનાતન ધર્મ'ના મુદ્દે મોટો ભડકો થયો છે. મંગળવારે તમિલનાડુ વિધાનસભામાં ગૃહને સંબોધતી વખતે વિરોધ પક્ષના નેતા (LoP) અને ડીએમકે ધારાસભ્ય ઉધયનિધિ સ્ટાલિનએ તેમના વિવાદાસ્પદ વલણને પુનરાવર્તિત કર્યું હતું. ઉધયનિધિએ સ્પષ્ટ શબ્દોમાં કહ્યું કે, "લોકોને અલગ પાડતા સનાતનને જડમૂળથી નાબૂદ કરવો જોઈએ."
જૂના વિવાદની યાદ તાજી થઈ
ઉધયનિધિ સ્ટાલિનનું આ નિવેદન ૨૦૨૩માં થયેલા તે ભીષણ વિવાદની યાદ અપાવે છે, જ્યારે તેમણે સનાતન ધર્મની તુલના રોગચાળા સાથે કરી હતી. તેમણે ફરીથી દલીલ કરી હતી કે સનાતન ધર્મ જાતિ અને ધર્મના નામે વિભાજન કરે છે અને તેને ઉખેડી નાખવો એ માનવ સમાનતા માટે જરૂરી છે. ભાજપના ધારાસભ્ય એમ. ભોજરાજને આ ટિપ્પણી પર પ્રતિક્રિયા આપતા કહ્યું હતું કે અત્યારે સ્પીકરનું સન્માન કરવાનો સમય છે અને આવી ઘટનાઓ પર તેઓ જવાબ આપવા તૈયાર નથી.
વંદે માતરમ અને તમિલ ગૌરવ પર જંગ
માત્ર સનાતન જ નહીં, પરંતુ ઉધયનિધિએ 'વંદે માતરમ' અંગે પણ ચિંતા વ્યક્ત કરી હતી. શપથ ગ્રહણ સમારોહ દરમિયાન રાજ્ય ગીત 'તમિલ થાઈ વાઝ્થુ' પહેલા વંદે માતરમ વગાડવામાં આવતા તેમણે વાંધો ઉઠાવ્યો હતો. તેમણે રાજ્યની TVK સરકારને તાકીદ કરી હતી કે તમિલનાડુના રાજ્ય ગીતને ક્યારેય બીજા સ્થાને ધકેલવું જોઈએ નહીં.
રાજકીય શિષ્ટાચાર અને કોલેજની જૂની યાદો
આક્રમક નિવેદનોની વચ્ચે ઉધયનિધિએ ગૃહમાં રાજકીય સભ્યતા જાળવવાની પણ અપીલ કરી હતી. રસપ્રદ વાત એ છે કે તેમણે મુખ્યમંત્રી વિજય અને પોતે એક જ કોલેજમાં અભ્યાસ કર્યો હોવાનો ઉલ્લેખ કરીને કહ્યું કે, ભલે આપણે અલગ-અલગ પક્ષમાં હોઈએ પણ રાજ્યના વિકાસ માટે સાથે મળીને કામ કરવું જોઈએ. સોમવારે મુખ્યમંત્રી વિજય અને ઉધયનિધિ વચ્ચેની સૌજન્ય મુલાકાત પણ ચર્ચાનો વિષય બની હતી, જેમાં રેશમી શાલ અને આલિંગન સાથે રાજકીય સૌહાર્દ જોવા મળ્યું હતું.
તમિલનાડુના રાજકારણમાં એક તરફ મુખ્યમંત્રી વિજય સાથેની મિત્રતા અને બીજી તરફ સનાતન સામેનો મોરચો - ઉધયનિધિના આ વલણે સમગ્ર દેશનું ધ્યાન ખેંચ્યું છે.