તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ઉદ્ધવ ઠાકરેના ૧૬ વિધાનસભ્યો એકનાથ શિંદેના સંપર્કમાં
મહારાષ્ટ્રના રાજકારણમાં ફરી એક વાર ‘‘ઓપરેશન ટાઈગર''ની ચર્ચાએ જોર પકડ્યું
મુંબઈઃ મહારાષ્ટ્રના રાજકારણમાં ફરી એક વાર ‘‘ઓપરેશન ટાઈગર''ની ચર્ચાએ જોર પકડ્યું છે. શિવસેના (શિદે ગ્રુપ)નો દાવો છે કે ઉદ્ધવ ઠાકરે ગ્રુપના અનેક ધારાસભ્યો તેમના સંપર્કમાં છે, જ્યારે ઉદ્ધવ ગ્રુપ આ દાવાઓને સંપૂર્ણપણે નકારી રહ્યું છે. આ દરમિયાન સૂત્રોના હવાલાથી વધુ એક મોટો દાવો સામે આવ્યો છે કે થોડા દિવસો પહેલાં ઉદ્ધવ ઠાકરે ગ્રુપના ત્રણથી ચાર ધારાસભ્યોએ ઉપ મુખ્ય મંત્રી એકનાથ શિદે સાથે મુલાકાત કરી હતી. જોકે આ મુલાકાતની સત્તાવાર પુષ્ટિ થઈ નથી.
સૂત્રોના જણાવ્યા મુજબ થોડા દિવસો પહેલા ઉદ્ધવ ઠાકરેની શિવસેના (UBT)ના ત્રણથી ચાર ધારાસભ્યોએ ઉપ મુખ્ય મંત્રી એકનાથ શિદે સાથે મુલાકાત કરી હતી અને જણાવ્યું હતું કે ૧૨થી ૧૪ ધારાસભ્યો તેમની સાથે છે તેમ જ એક મોટું જૂથ શિદે સાથે જોડાવા ઈચ્છે છે. જોકે આ મુલાકાતની સત્તાવાર પુષ્ટિ થઈ નથી.
બે દિવસ પહેલાં મહાવિકાસ આઘાડીના ધારાસભ્યોની બેઠક પણ યોજવામાં આવી હતી. આ બેઠકમાં ગઠબંધનના કુલ ૬૦ ધારાસભ્યોમાંથી માત્ર ૩૭ ધારાસભ્યો જ હાજર રહ્યા હતા. બેઠક બાદ મહાવિકાસ આઘાડીએ સ્પષ્ટતા કરી હતી કે ઘણા ધારાસભ્યો વ્યક્તિગત કામ અને અગાઉથી નક્કી થયેલા કાર્યક્રમોને કારણે હાજર રહી શક્યા નહોતા.
આ સમગ્ર ઘટનાક્રમ વચ્ચે ‘‘ઓપરેશન ટાઈગર''ની ચર્ચા ફરી તેજ થઈ છે. તાજેતરમાં ઉદ્ધવ ઠાકરે ગ્રુપના કેટલાક સાંસદો શિદે ગ્રુપમાં જોડાયા બાદ હવે આગામી તબક્કામાં ધારાસભ્યોમાં ફૂટ પડવાની અટકળો વ્યક્ત થઈ રહી છે. શિદે ગ્રુપનો દાવો છે કે ઉદ્ધવ ઠાકરે ગ્રુપના ૨૦ ધારાસભ્યોમાંથી ૧૪થી ૧૬ ધારાસભ્યો તેમના સંપર્કમાં છે.
આ દાવાઓ પર પ્રતિક્રિયા આપતાં સંજય રાઉતે કહ્યું કે તેમના બધા ધારાસભ્યો ઉદ્ધવ ઠાકરેના સંપર્કમાં છે અને જે ધારાસભ્યો બેઠકમાં હાજર રહ્યા નહોતા, તેઓ વ્યક્તિગત કારણોસર ગેરહાજર હતા. રાઉતે ટિપ્પણી કરતાં કહ્યું કે ઓપરેશન ટાઈગરનો સૌથી મોટો ખતરો દેવેન્દ્ર ફડણવીસને છે અને સૌથી વધુ સાવચેત રહેવાની જરૂર પણ તેમને જ છે
(2:49 PM IST)
છેલ્લા 8 દિવસમાં સૌથી લોકપ્રિય 
