હરારે, તા.૦૧: ઝિમ્બાબ્વેની રાજધાની હરારેની પૂર્વ દિશામાં આવેલા મરોન્ડેરાના ગ્રામીણ વિસ્તારમાં બુધવારે સાંજે એક ગંભીર હેલિકોપ્ટર દુર્ઘટના સર્જાઈ હતી, જેમાં સવાર જાણીતા ઉદ્યોગપતિ, મુસાફરો અને પાઇલટ સહિત તમામ છ લોકોના કમકમાટીભર્યા મોત થયા છે. આ કરૂણ હોનારતની પુષ્ટિ સરકારી પ્રવક્તા નિક મંગવાના દ્વારા સોશિયલ મીડિયા પ્લેટફોર્મ પર કરવામાં આવી છે. અચાનક સર્જાયેલી આ વિમાન દુર્ઘટનાને કારણે સમગ્ર દેશમાં ભારે અરેરાટી અને શોકની કાળી ડિબંગ છાયા ફરી વળી છે.

સરકારી પ્રવક્તા નિક મંગવાનાએ આપેલી અધિકૃત વિગતો અનુસાર, દુર્ઘટનાગ્રસ્ત થયેલા હેલિકોપ્ટરમાં એક જાણીતા ઉદ્યોગપતિ, ત્રણ મુસાફરો અને બે પાઇલટ સહિત કૂલ છ વ્યક્તિઓ સવાર હતી. પ્રારંભિક નિવેદનમાં ચાર મુસાફરો હોવાનો ઉલ્લેખ કરવામાં આવ્યો હતો, પરંતુ બાદમાં સત્તાવાર સ્પષ્ટતા કરીને કૂલ છ લોકોના મોત થયાનું જણાવાયું હતું. દુર્ઘટના એટલી ભયાનક હતી કે કટોકટી સેવાઓ સ્થળ પર પહોંચે તે પહેલા જ તમામ સવારોએ જીવ ગુમાવ્યા હતા.

આ ભયાનક વિમાન દુર્ઘટના અંગે સ્થાનિક ઓનલાઈન મીડિયા રિપોર્ટ્સમાંથી મળતી વિગતો મુજબ, હેલિકોપ્ટરમાં સવાર મૃતકોમાં ઝિમ્બાબ્વેના ચર્ચિત અને પ્રખ્યાત ઉદ્યોગપતિ વિકનેલ ચિવાયોનો પણ સમાવેશ થતો હતો. જોકે, વહીવટી તંત્ર દ્વારા તમામ કાનૂની અને તબીબી પ્રક્રિયા પૂર્ણ કર્યા બાદ જ સત્તાવાર રીતે મૃતકોના નામોની પુષ્ટિ કરવાની વાત કહેવામાં આવી છે.

સ્થાનિક પોલીસના જણાવ્યા અનુસાર, આ ઘટના બુધવારે સ્થાનિક સમય મુજબ સાંજે આશરે ૫:૦૦ વાગ્યાના સુમારે (૧૫:૦૦ GMT) બની હતી. હેલિકોપ્ટર મરોન્ડેરા ક્ષેત્રમાંથી પસાર થઈ રહ્યું હતું ત્યારે અચાનક તૂટી પડ્યું હતું. બનાવની જાણ થતાં જ પોલીસ કાફલો અને ઇમરજન્સી રેસ્ક્યૂ ટીમો તુરંત ઘટનાસ્થળે દોડી ગઈ હતી અને રાહત કામગીરી હાથ ધરી હતી.

પોલીસ પ્રવક્તા પોલ ન્યાથીએ આ કરૂણ બનાવ અંગે માહિતી આપતા જણાવ્યું હતું કે હેલિકોપ્ટર જમીન પર પટકાતાની સાથે જ તેમાં ભીષણ આગ લાગી ગઈ હતી, જેના કારણે તમામ મૃતદેહો ગંભીર રીતે દાઝી ગયા છે. આ સ્થિતિને કારણે સત્તાવાળાઓ માટે મૃતકોની ઔપચારિક અને કાનૂની ઓળખ કરવી અત્યંત જરૂરી અને પડકારજનક બની ગઈ છે.

હાલમાં સિવિલ એવિએશન અને સુરક્ષા એજન્સીઓ દ્વારા હેલિકોપ્ટર કયા ટેકનિકલ કારણોસર કે હવામાનની ખરાબીને લીધે ક્રેશ થયું તેની ઊંડાણપૂર્વક તપાસ શરૂ કરવામાં આવી છે. આ ગોઝારા અકસ્માત બાદ સ્થાનિક ફોરેન્સિક ટીમો દ્વારા મૃતદેહોની ડીએનએ પ્રોફાઇલિંગ સહિતની પ્રક્રિયા હાથ ધરવામાં આવી રહી છે, જેથી વહેલી તકે મૃતદેહો તેમના પરિવારોને સોંપી શકાય.