તરનતારન :સરહદે ગોળીબાર મામલે પાકિસ્તાને ભારતીય રાજદૂતને તેડવ્યા છે. પાકિસ્તાની વિદેશ મંત્રાલયે પંજાબના તરનતારનમાં ભારત-પાકિસ્તાન સરહદે 2 લોકોના મોત પર વિરોધ નોંધાવ્યો છે. પાકિસ્તાને દાવો કર્યો કે, બંને પાકિસ્તાની નાગરિક હતા અને BSF દ્વારા કરાયેલ ગોળીબારમાં તેમનું મોત થયું હતું. આ ઘટના શુક્રવારની છે, જ્યારે ભારતીય અધિકારીઓ અનુસાર આ લોકો ભારતીય સરહદમાં પ્રવેશવાની તૈયારીમાં હતા.

ભારતીય અધિકારીઓ અનુસાર, 3 શંકાસ્પદ લોકો પાકિસ્તાન તરફથી ભારતીય સરહદ તરફ આગળ વધી રહ્યા હતા. BSF જવાનોએ તેમને અટકી જવા ચેતવણી આપી હતી. તેમાંથી એક વ્યક્તિ પાકિસ્તાન તરફ પરત ફર્યો હતો, જ્યારે 2 લોકો આગળ વધતા રહ્યા, જે પછી BSFએ ગોળીબાર કર્યો અને તેમાં 2 લોકોના મોત થયા હતા. તરનતારનમાં છેલ્લા 7 મહિનામાં ઘૂસણખોરીની આ બીજી મોટી ઘટના સામે આવી છે.

પાકિસ્તાની વિદેશ મંત્રાલયે દાવો કર્યો છે કે આ બંને સામાન્ય નાગરિક હતા, તેમની પાસે કોઈ હથિયાર નહોતા અને તેઓ અજાણતા આંતરરાષ્ટ્રીય સરહદ પાર કરી ગયા હતા. પાકિસ્તાને આ મામલે તાત્કાલિક, પારદર્શક અને વિશ્વસનીય તપાસની માંગ કરી છે. પાકિસ્તાની મીડિયા અનુસાર મૃતકોમાં આજમત રસૂલ અને મોહસિન જટ્ટનો સમાવેશ થાય છે, જ્યારે ત્રીજી વ્યક્તિ ઈજાગ્રસ્ત થઈને હાલ સારવાર હેઠળ છે.

આ ઘટના અગાઉ પણ સરહદ પર ઘૂસણખોરીના અનેક સંવેદનશીલ બનાવોની યાદ અપાવે છે. હાલમાં પાકિસ્તાનના વિરોધ અને સમન બાદ બંને દેશો વચ્ચે રાજદ્વારી સ્તરે તણાવ વધ્યો છે, ત્યારે આગામી સમયમાં આ મામલે સુરક્ષા એજન્સીઓ દ્વારા વધુ વિગતવાર તપાસ હાથ ધરવામાં આવશે અને સરહદી સુરક્ષા વ્યવસ્થા વધુ કડક કરવામાં આવશે.