​મુંબઈ:શહેરના દહિસર પૂર્વ વિસ્તારમાં આવેલા કેટકીપાડામાં શનિવારે સવારે એક અત્યંત કરુણ અને હૃદયદ્રાવક ઘટના સામે આવી છે. કોલેજમાં અભ્યાસ અર્થે જવાના બદલે મોજ-મસ્તી કરવા માટે નીકળેલા ચાર મિત્રોમાંથી બે વિદ્યાર્થીઓનું પાણીથી ભરેલી ખાણમાં ડૂબી જવાથી મૃત્યુ થયું છે. મૃતક યુવાનોની ઓળખ ૧૯ વર્ષીય ઓમ અંકુશ સિંહ (રહે. અંધેરી) અને ૧૮ વર્ષીય પીયૂષ ગુપ્તા (રહે. કાંદિવલી) તરીકે કરવામાં આવી છે. આ દુર્ઘટના બાદ વિસ્તારમાં ભારે ચકચાર મચી ગઈ છે.

​પરિવારથી છુપાવીને નીકળ્યા હતા પિકનિક પર

પોલીસ અને ફાયર બ્રિગેડના સૂત્રોના જણાવ્યા અનુસાર, કાંદિવલીની એક કોલેજમાં કોમર્સના પ્રથમ વર્ષમાં ભણતા આ ચાર મિત્રો શનિવારે કોલેજ જવાનું કહીને ઘરેથી નીકળ્યા હતા. પરંતુ તેઓ કોલેજ જવાને બદલે દહિસરના કેટકીપાડા વિસ્તારમાં આવેલા સંજય ગાંધી નેશનલ પાર્કની સરહદ નજીક શેખ ખાણ (ક્વોરી) તરફ ફરવા ગયા હતા. આ ખાણ જૂની અને બંધ થઈ ગયેલી છે, જેમાં ચોમાસાને કારણે ૩૦ થી ૪૦ ફૂટ જેટલું ઊંડું પાણી ભરાઈ રહેતું હોય છે.

​બચાવવા માટે ફેંક્યા હતા દફ્તર, પણ નસીબમાં કંઈક બીજું જ હતું

સ્થળ પર હાજર મિત્રોના જણાવ્યા મુજબ, ખાણ પાસે પહોંચ્યા બાદ ચારેય યુવાનોએ ત્યાં સમય વિતાવ્યો હતો. પ્રાથમિક તપાસમાં પોલીસને એવી શંકા છે કે યુવાનોએ પાણીમાં ઉતરતા પહેલા દારૂનું સેવન કર્યું હોઈ શકે છે. નશાની હાલતમાં અને ખાણના પાણીની ઊંડાઈનો અંદાજ ન હોવાને કારણે ઓમ અને પીયૂષ પાણીના વધુ ઊંડા ભાગમાં જતા રહ્યા હતા અને ગભરાઈ જવાથી ડૂબવા લાગ્યા હતા. તેમને ડૂબતા જોઈને તેમના બાકીના બે મિત્રોએ તેમને બચાવવા માટે પોતાની કોલેજની બેગ્સ પાણીમાં ફેંકી હતી, જેથી તેઓ તેને પકડીને બહાર આવી શકે, પરંતુ તેમની આ આખી કોશિશ નિષ્ફળ રહી હતી.

​પોલીસ તપાસમાં શું બહાર આવ્યું?

ઘટનાની જાણ થતા જ ફાયર બ્રિગેડ અને દહિસર પોલીસની ટીમ તાત્કાલિક સ્થળ પર પહોંચી ગઈ હતી. ફાયર બ્રિગેડના જવાનોએ ભારે જહેમત બાદ બંને યુવાનોના મૃતદેહોને બહાર કાઢીને નજીકની શતાબ્દી હોસ્પિટલમાં ખસેડ્યા હતા, જ્યાં ફરજ પરના તબીબોએ તેમને મૃત જાહેર કર્યા હતા. પોલીસ દ્વારા આ સમગ્ર પ્રકરણમાં આકસ્મિક મૃત્યુ (ADR) નો ગુનો નોંધી વધુ તપાસ હાથ ધરવામાં આવી છે. પોલીસ હવે પોસ્ટમોર્ટમ રિપોર્ટની રાહ જોઈ રહી છે જેથી મૃતકોએ ખરેખર નશો કર્યો હતો કે કેમ તે અંગેની સ્પષ્ટતા થઈ શકે.

​આ ખાણ વિસ્તારમાં અગાઉ પણ અનેક વખત આવી જીવલેણ ઘટનાઓ બની ચૂકી છે. સ્થાનિકોએ ચેતવણીના બોર્ડ અને બેરિકેડ્સ હોવા છતાં યુવાનો વારંવાર જીવના જોખમે આવા જોખમી સ્થળોએ પહોંચી જતા હોવાથી ચિંતા વ્યક્ત કરી હતી. વિદ્યાર્થીઓના અચાનક થયેલા મૃત્યુથી તેમના પરિવારો પર આભ તૂટી પડ્યું છે.