ભોપાલ, તા.26: બહુચર્ચિત ત્વિષા શર્મા મૃત્યુ કેસમાં હવે તપાસની ધુરા સંપૂર્ણપણે સેન્ટ્રલ બ્યુરો ઓફ ઇન્વેસ્ટિગેશન (CBI) ના હાથમાં આવી ગઈ છે. દેશની સર્વોચ્ચ તપાસ એજન્સીએ ભોપાલના કટારા હિલ્સ પોલીસ સ્ટેશનમાં નોંધાયેલી FIRને ફરીથી નોંધીને તપાસના શ્રીગણેશ કરી દીધા છે. નાયબ પોલીસ અધિક્ષક નિશુ કુશવાહાના નેતૃત્વમાં CBIની ટીમે આજે મુખ્ય આરોપી સમર્થ સિંહના ઘરે પહોંચીને ઘટનાસ્થળનું ઝીણવટભર્યું નિરીક્ષણ કર્યું હતું. આ કેસે દેશભરમાં ભારે ચકચાર જગાવી છે અને હવે CBIની સક્રિયતાને પગલે આરોપીઓ માટે મુસીબતોનો પહાડ તૂટી પડ્યો છે.
સમર્થ સિંહની મુશ્કેલીમાં વધારો, વકીલોએ પણ સાથ છોડ્યો
એક તરફ CBIની પૂછપરછનો સામનો કરી રહેલા ત્વિષાના પતિ સમર્થ સિંહની મુશ્કેલીઓમાં સતત વધારો થઈ રહ્યો છે. જેલના સળિયા પાછળ ધકેલાયેલા સમર્થ સિંહનો સાથ તેના વકીલો પણ છોડી રહ્યા છે, જેનાથી તેની કાનૂની સ્થિતિ વધુ નબળી પડી છે. બીજી તરફ, આ કેસમાં આરોપી તરીકે નામ ધરાવતા નિવૃત્ત ન્યાયાધીશ ગિરીબાલા સિંહ અત્યારે આગોતરા જામીન પર છે, પરંતુ CBI ટૂંક સમયમાં તેમને સમન્સ જારી કરીને પૂછપરછ કરી શકે છે.
આજની કોર્ટ કાર્યવાહી અને CDR-CCTVનું મહત્વ
આજે બપોરે 3 વાગ્યે ભોપાલ જિલ્લા કોર્ટમાં એક અત્યંત મહત્વપૂર્ણ સુનાવણી યોજાઈ છે. આ સુનાવણીનો મુખ્ય મુદ્દો મૃતક ત્વિષા શર્માના CDR (કોલ ડિટેલ રેકોર્ડ) અને ઘટનાસ્થળના CCTV ફૂટેજને સુરક્ષિત રાખવાનો છે. આ પુરાવા કેસના નિકાલ માટે નિર્ણાયક માનવામાં આવે છે, તેથી બંને પક્ષોએ પોતાની દલીલો કોર્ટ સમક્ષ મૂકી છે. CBIની ટીમ પણ આ કાર્યવાહી પર નજર રાખી રહી છે, કારણ કે આ ડિજિટલ પુરાવા જ સત્ય સુધી પહોંચવાનો માર્ગ મોકળો કરશે.
સુપ્રીમ કોર્ટનો કડક નિર્દેશ
સમગ્ર કેસ પર વધી રહેલી લોકોની નજર અને સોશિયલ મીડિયા પરની ચર્ચાને ધ્યાનમાં રાખીને સુપ્રીમ કોર્ટે પીડિત પરિવાર અને આરોપી પક્ષ બંનેને મીડિયાથી દૂર રહેવા અને બિનજરૂરી નિવેદનબાજી ન કરવાનો આદેશ આપ્યો છે. મધ્યપ્રદેશ હાઈકોર્ટે પણ આ કાર્યવાહીમાં ઝડપ લાવવા માટે 27 મેના રોજ તાત્કાલિક સુનાવણી નક્કી કરી છે.
ઉલ્લેખનીય છે કે, 12 મેના રોજ ત્વિષા શર્માનો મૃતદેહ તેના સાસરિયાના ઘરેથી મળી આવ્યો હતો, ત્યારબાદ પરિવારે દહેજ ઉત્પીડન અને હત્યાનો ગંભીર આરોપ લગાવ્યો હતો. હવે જ્યારે CBI તપાસ કરી રહી છે, ત્યારે આ કેસમાં કયા નવા તથ્યો બહાર આવે છે, તેના પર સમગ્ર દેશની મીટ મંડાયેલી છે.