અમેરિકાના ૧૯૭૩ના 'વોર પાવર એક્ટ' હેઠળ કોંગ્રેસની મંજૂરી વિના સૈન્ય કાર્યવાહી ચાલુ રાખવી મુશ્કેલ, પાકિસ્તાનમાં શાંતિ વાટાઘાટો નિષ્ફળ જતાં હવે ડોનાલ્ડ ટ્રમ્પના આગામી કદમ પર સમગ્ર વિશ્વની નજર, ૨૯ એપ્રિલ કે ૧ મે ના રોજ કાનૂની સમયમર્યાદા પૂર્ણ થતા અમેરિકી રાજકારણમાં સર્જાયો ગજગ્રાહ
વોશિંગ્ટન: અમેરિકા અને ઈરાન વચ્ચે છેડાયેલા ભીષણ સંઘર્ષને ટૂંક સમયમાં ૬૦ દિવસ પૂર્ણ થવા જઈ રહ્યા છે, ત્યારે પ્રમુખ ડોનાલ્ડ ટ્રમ્પ સામે કાયદાકીય કટોકટી ઉભી થઈ છે. ૧૯૭૩ના 'યુદ્ધ સત્તા અધિનિયમ' મુજબ, સંસદની મંજૂરી વગર શરૂ કરાયેલી કોઈ પણ લશ્કરી કાર્યવાહી માત્ર ૬૦ દિવસ સુધી જ ચલાવી શકાય છે. જો કે, આ સમયમર્યાદા ક્યારે પૂરી થશે તે બાબતે અમેરિકી ધારાશાસ્ત્રીઓમાં ભારે મતભેદ છે. ડેમોક્રેટ્સનું માનવું છે કે હુમલાના ૬૦ દિવસ ૨૯ એપ્રિલે પૂર્ણ થાય છે, જ્યારે રિપબ્લિકન પક્ષના કેટલાક વકીલોનું કહેવું છે કે કોંગ્રેસને જાણ કર્યાના ૬૦ દિવસ એટલે કે ૧ મે સુધી આ મર્યાદા અમલી રહેશે. આ કાનૂની ગૂંચવણ વચ્ચે મધ્ય પૂર્વમાં સ્થિતિ અત્યંત નાજુક બની ગઈ છે.
પરિસ્થિતિ ત્યારે વધુ વણસી જ્યારે પાકિસ્તાનના ઇસ્લામાબાદમાં યોજાનારી શાંતિ વાટાઘાટોનો બીજો રાઉન્ડ અનિશ્ચિતકાળ માટે ટળી ગયો. ઈરાનના વિદેશ પ્રધાન અબ્બાસ અરાઘચી પાકિસ્તાની અધિકારીઓને મળીને પરત ફર્યા છે, પરંતુ અમેરિકી પ્રતિનિધિ મંડળ ત્યાં પહોંચ્યું જ નહોતું. પ્રમુખ ટ્રમ્પે તેમના ખાસ દૂત સ્ટીવ વિટકોફ અને જમાઈ જેરેડ કુશનરનો પાકિસ્તાન પ્રવાસ અચાનક રદ કરી દેતા રાજદ્વારી ઉકેલની આશા ધૂંધળી બની છે. રોઇટર્સના અહેવાલ મુજબ, ટ્રમ્પ વહીવટીતંત્ર પાસે ઈરાન હુમલો કરવાનું હતું તેવી કોઈ નક્કર ગુપ્ત માહિતી ન હોવા છતાં આ યુદ્ધ છેડાયું હોવાના આક્ષેપો થતાં વિરોધ પક્ષો હવે આક્રમક મૂડમાં છે.
હાલમાં ભલે સરહદ પર કામચલાઉ યુદ્ધવિરામ જેવી સ્થિતિ હોય, પરંતુ ટ્રમ્પ વહીવટીતંત્ર આ મર્યાદાને કઈ રીતે લેશે તે જોવું રહ્યું. ઐતિહાસિક રીતે, કોઈ પણ અમેરિકી પ્રમુખે આ કાયદાને સંપૂર્ણપણે બંધનકર્તા માન્યો નથી. જો ટ્રમ્પ કોંગ્રેસની મંજૂરી વિના હુમલા ચાલુ રાખે છે, તો અમેરિકામાં બંધારણીય કટોકટી સર્જાઈ શકે છે. બીજી તરફ, જો વધારાના ૩૦ દિવસની છૂટછાટ લઈને સૈન્ય પાછું ખેંચવાની પ્રક્રિયા શરૂ કરવામાં આવે, તો મધ્ય પૂર્વમાં ઈરાનનું વર્ચસ્વ વધવાનો ડર પણ પેન્ટાગોનને સતાવી રહ્યો છે. આ રસાકસી વચ્ચે આગામી ૪૮ કલાક સમગ્ર વિશ્વની ભૂરાજકીય સ્થિતિ માટે અત્યંત નિર્ણાયક સાબિત થશે.