વોશિંગ્ટન:અમેરિકા અને ઈરાન વચ્ચે છેલ્લા કેટલાક સમયથી ચાલી રહેલો સૈન્ય તણાવ હવે આખરી અને નિર્ણાયક તબક્કામાં પહોંચી ગયો છે. યુએસ પ્રમુખ ડોનાલ્ડ ટ્રમ્પે રવિવાર સુધીમાં કોઈ આકરો અથવા ઐતિહાસિક નિર્ણય લેવાના સ્પષ્ટ સંકેતો આપ્યા છે, જેનાથી પશ્ચિમ એશિયામાં યુદ્ધના વાદળો વિખેરાઈ શકે છે અથવા તો મહાયુદ્ધ ફાટી નીકળી શકે છે. હાલમાં બંને દેશો વચ્ચે મધ્યસ્થીના પ્રયાસો તેજ બન્યા હોવા છતાં લશ્કરી સંઘર્ષની શક્યતાઓ બરાબર પચાસ-પચાસ ટકા જેટલી જ તોળાઈ રહી છે.

વૈશ્વિક રાજદ્વારી વર્તુળોમાં વહેતા થયેલા અહેવાલો અનુસાર, રાષ્ટ્રપતિ ટ્રમ્પ કાં તો ઈરાન વિરુદ્ધ આક્રમક લશ્કરી કાર્યવાહીને લીલી ઝંડી આપશે અથવા લાંબા ગાળાના શાંતિ કરારના માર્ગ પર આગળ વધશે. અમેરિકન મીડિયા સંસ્થા એક્સિઓસના રિપોર્ટ પ્રમાણે, ઈરાન દ્વારા મોકલવામાં આવેલા એક તદ્દન નવા શાંતિ પ્રસ્તાવ પર ટ્રમ્પ વહીવટીતંત્ર હાલમાં ખૂબ જ ઝીણવટપૂર્વક અભ્યાસ કરી રહ્યું છે અને રવિવાર સાંજ સુધીમાં આખા વિશ્વની નજર વ્હાઇટ હાઉસના સત્તાવાર એલાન પર ટકેલી રહેશે.

આ અત્યંત સંવેદનશીલ અને હાઈ-પ્રોફાઈલ મંત્રણાને આખરી ઓપ આપવા માટે પ્રમુખ ડોનાલ્ડ ટ્રમ્પ તેમના ખાસ દૂત સ્ટીવ વિટકોફ અને પોતાના જમાઈ જેરેડ કુશનર સાથે એક કટોકટી બેઠક યોજવાના છે. આ બેઠક એટલી મહત્વપૂર્ણ માનવામાં આવી રહી છે કે અમેરિકાના ઉપરાષ્ટ્રપતિ જે.ડી. વાન્સ પણ પોતાના અન્ય તમામ સત્તાવાર પ્રવાસો અધવચ્ચે છોડીને તાત્કાલિક વોશિંગ્ટન પરત ફરી રહ્યા છે, જેથી કરીને ઈરાનની નાકાબંધી અથવા સંધિ અંગે અંતિમ મહોર મારી શકાય.

બીજી તરફ આંતરરાષ્ટ્રીય ન્યૂઝ ચેનલ અલ જઝીરાના અહેવાલ મુજબ, તેહરાનના વરિષ્ઠ અધિકારીઓએ ખુલાસો કર્યો છે કે તેઓ પાકિસ્તાનની મધ્યસ્થી દ્વારા તૈયાર કરાયેલા કરારના પ્રારંભિક મુસદ્દા (ડ્રાફ્ટ) પર સહમત થઈ ચૂક્યા છે. ઈરાન તરફથી મોકલવામાં આવેલા આ પ્રસ્તાવમાં વર્તમાન સશસ્ત્ર સંઘર્ષનો કાયમી અંત આણવો, આર્થિક નાકાબંધી હટાવવી, વ્યૂહાત્મક રીતે અતિ મહત્વની ગણાતી હોર્મુઝ સ્ટ્રેટ (સમુદ્રધૂની) વૈશ્વિક વેપાર માટે ફરી ખોલવી અને સંઘર્ષના વિસ્તારોમાંથી અમેરિકી સૈનિકો પાછા ખેંચવાની શરતો સામેલ છે.

જોકે, આ પ્રસ્તાવની સૌથી મોટી અને ચોંકાવનારી બાબત એ છે કે તેમાં ઈરાનના વિવાદિત પરમાણુ કાર્યક્રમનો કોઈ ઉલ્લેખ કરવામાં આવ્યો નથી. આ ડ્રાફ્ટમાં પરમાણુ મુદ્દાઓને હાલ પૂરતા બાકાત રાખીને આગામી ૩0 દિવસ પછી તેના પર અલગથી ચર્ચા કરવાની શરત મુકાઈ છે, અને ઈરાને સ્પષ્ટ કર્યું છે કે તે આનાથી વધુ કોઈ ઝૂકવા તૈયાર નથી. હવે રવિવારે અમેરિકા આ શરતો સ્વીકારીને શાંતિનો માર્ગ અપનાવે છે કે પછી પશ્ચિમ એશિયાને યુદ્ધની આગમાં ધકેલે છે તે જોવું રહ્યું.