​નવી દિલ્હી:યુનાઇટેડ સ્ટેટ્સ (US) તરફ પ્રયાણ કરવા માંગતા ભારતીય નાગરિકો અને પ્રવાસીઓ માટે વિઝા પ્રક્રિયાને લઈને મોટા સમાચાર સામે આવ્યા છે. અમેરિકી વિઝિટર વિઝા (B1/B2) મેળવવા માટે ભારતીય અરજદારોએ હવે લાંબી રાહ જોવી પડી રહી છે. યુએસ ડિપાર્ટમેન્ટ ઓફ સ્ટેટ (US Department of State) દ્વારા જાહેર કરવામાં આવેલા અધ્યતન ડેટા અનુસાર, ભારતમાં આવેલી વિવિધ અમેરિકન કન્સ્યુલેટ્સમાં વિઝિટર વિઝા ઇન્ટરવ્યુ મેળવવા માટેનો વેટિંગ પિરિયડ વધીને ૧૨ મહિના (એક આખા વર્ષ) સુધી પહોંચી ગયો છે.

​અમેરિકી विदेश વિભાગના ગ્લોબલ વિઝા વેટિંગ ટાઈમ્સ ડેટા અનુસાર, ભારતમાં આવેલા પાંચ મુખ્ય યુએસ કન્સ્યુલર પોસ્ટ્સમાં વિઝિટર વિઝાની સ્થિતિ અલગ-અલગ જોવા મળી રહી છે. આ યાદીમાં તેલંગાણાનું હૈદરાબાદ સૌથી આગળ છે, જ્યાં B1/B2 વિઝિટર વિઝા માટેની આગામી ઉપલબ્ધ એપોઇન્ટમેન્ટ મેળવવામાં આશરે ૧૨ મહિના જેટલો સમય લાગે છે. મુંબઈ સ્થિત કન્સ્યુલેટમાં આ સમયગાળો ૧૧.૫ મહિનાનો છે, જ્યારે રાજધાની નવી દિલ્હીમાં અરજદારોએ ૧૦ મહિના સુધી રાહ જોવી પડી રહી છે. બીજી તરફ, દક્ષિણ ભારતના ચેન્નાઈમાં ૭.૫ મહિના અને પશ્ચિમ બંગાળના કોલકાતા કન્સ્યુલેટમાં ૬.૫ મહિનાનો વેટિંગ પિરિયડ નોંધાયો છે, જે અન્ય શહેરોની તુલનામાં થોડો ઓછો છે.

​વિદ્યાર્થી અને વર્ક વિઝામાં મોટી રાહત

પર્યટન અને બિઝનેસ પ્રવાસ (B1/B2) માટે ભલે લાંબુ વેટિંગ હોય, પરંતુ અભ્યાસ અને રોજગાર અર્થે યુએસ જવા માંગતા અરજદારો માટે સ્થિતિ ઘણી સાનુકૂળ છે. F, M અને J કેટેગરી હેઠળ આવતા સ્ટુડન્ટ અને એક્સચેન્જ વિઝિટર વિઝા માટે પ્રક્રિયા ખૂબ જ ઝડપી છે. ચેન્નાઈમાં આ કેટેગરી માટે અડધા મહિનાથી પણ ઓછો સમય લાગે છે, હૈદરાબાદમાં ૧.૫ મહિનો, જ્યારે નવી દિલ્હી અને કોલકાતામાં ૨ મહિના તથા મુંબઈમાં ૨.૫ મહિનાનું વેટિંગ છે.

​તેવી જ રીતે, H, L, O, P અને Q કેટેગરી ધરાવતા પિટિશન-બેઝ્ડ વર્ક વિઝા માટે કોલકાતામાં માત્ર ૧ મહિનો, ચેન્નાઈ અને મુંબઈમાં ૧.૫ મહિનો તથા નવી દિલ્હીમાં ૩ મહિનાનો સમય લાગે છે. વર્ક વિઝા માટે સૌથી વધુ ૫.૫ મહિનાનો વેટિંગ પિરિયડ હૈદરાબાદમાં નોંધાયો છે.

​નિયમિત ધોરણે સ્લોટ ઉમેરાતા હોવાથી તારીખ વહેલી મળવાની શક્યતા

અમેરિકી સ્ટેટ ડિપાર્ટમેન્ટ દ્વારા સ્પષ્ટતા કરવામાં આવી છે કે બહાર પાડવામાં આવેલા વેટિંગ ટાઈમના આંકડા એક અંદાજિત ગણતરી છે. એમ્બેસી અને કન્સ્યુલેટ્સ દ્વારા સમયઅંતરે નવા એપોઇન્ટમેન્ટ સ્લોટ્સ ખુલ્લા મુકવામાં આવતા હોય છે. જેથી જે અરજદારોએ અગાઉથી એપોઇન્ટમેન્ટ બુક કરી લીધી હોય, તેઓ સિસ્ટમ ચેક કરીને રદ થયેલા કે નવા ખુલેલા સ્લોટના આધારે પોતાની ઇન્ટરવ્યુ તારીખ વહેલી મેળવી શકે છે. ઉપરાંત, આ ગણતરીમાં ઇન્ટરવ્યુ વેવર (ડ્રોપબોક્સ) સુવિધા માટે લાયક ઉમેદવારોનો સમાવેશ કરવામાં આવ્યો નથી.

​અમેરિકાની યાત્રાનું આયોજન કરી રહેલા ભારતીય પ્રવાસીઓ અને વ્યાપારીઓને સલાહ આપવામાં આવી છે કે તેઓ પોતાની યાત્રાના શિડ્યુલિંગમાં આ લાંબા સમયગાળાને ધ્યાનમાં રાખીને અગાઉથી અરજી કરે.