નાગોયા : એશિયન ગેમ્સ ૨૦૨૬માં ભારત અને પાકિસ્તાન વચ્ચે ખેલાનારા અત્યંત રોમાંચક ગોલ્ડ મેડલ મુકાબલા પહેલાં એક નવો ડ્રામા સામે આવ્યો છે. એશિયન ક્રિકેટ કાઉન્સિલ (ACC) ના પ્રમુખ, પાકિસ્તાન ક્રિકેટ બોર્ડ (PCB) ના ચેરમેન અને પાકિસ્તાનના ગૃહમંત્રી મોહસીન નકવીએ જાપાનના નાગોયા ખાતે યોજાનારી આ ઈતિહાસિક ફાઈનલ મેચમાં હાજરી આપવાનો ઈનકાર કરી દીધો છે. પૂર્વ-નિર્યાણિત કાર્યક્રમોનું બહાનું બતાવીને નકવીએ મેચથી દૂર રહેવાનો નિર્ણય કર્યો છે, જેના પછી સોશિયલ મીડિયા પર ચાહકો તેમને આડે હાથ લઈ રહ્યા છે.

નકવીનો શુભેચ્છા સંદેશ અને ફાઈનલથી દૂર રહેવાની જાહેરાત

ACC એ પોતાના સત્તાવાર સોશિયલ મીડિયા હેન્ડલ પર મોહસીન નકવીનો સંદેશ શેર કર્યો છે. નકવીએ જણાવ્યું હતું કે, "એશિયન ગેમ્સ ૨૦૨૬ માં ગોલ્ડ અને બ્રોન્ઝ મેડલની મેચો પહેલાં તમામ સ્પર્ધકોને ખૂબ ખૂબ શુભેચ્છાઓ. અન્ય અનિવાર્ય કામોને કારણે હું નાગોયામાં રૂબરૂ હાજર રહી શકીશ નહીં, પરંતુ હું આ રોમાંચક મુકાબલા જોવા માટે આતુર રહીશ." ઉલ્લેખનીય છે કે ભારત-પાકિસ્તાન ગોલ્ડ મેડલ મેચ ઉપરાંત શનિવાર, ૩ ઓક્ટોબરે બાંગ્લાદેશ અને શ્રીલંકા વચ્ચે બ્રોન્ઝ મેડલ માટેની મેચ પણ રમાનાર છે.

‘ટ્રોફી ચોર’ અને ‘ફજેતીનો ડર’: નેટીઝન્સના આકરા પ્રહારો

નકવીના આ નિર્ણય બાદ ઈન્ટરનેટ પર ક્રિકેટપ્રેમીઓએ તેમની ભારે મજાક ઉડાવી છે. સોશિયલ મીડિયા યુઝર્સ દાવો કરી રહ્યા છે કે નકવી ભારત સામે પાકિસ્તાનની હાર અને પોતાની ફજેતી પહેલેથી જ જાણી ગયા છે, તેથી જ તેઓ ભાગી રહ્યા છે. એક યુઝરે આકરા શબ્દોમાં લખ્યું, "તેઓ પરિણામ પહેલેથી જ જાણે છે... એટલે પોતાની ફજેતી ટાળવા ગાયબ થઈ રહ્યા છે." જ્યારે અન્ય એક ફેને કટાક્ષ કરતા લખ્યું, "ટ્રોફી ચોરને ગોલ્ડ મેડલ એનાયત કરવા માટે આમંત્રણ જ કોણ આપશે?"

એશિયા કપ ટ્રોફી વિવાદનો જૂનો ઈતિહાસ

મોહસીન નકવીની ગેરહાજરી પાછળ ભૂતકાળના ટ્રોફી વિવાદો પણ મુખ્ય કારણ માનવામાં આવે છે. ૨૦૨૫ના મેન્સ એશિયા કપ અને ૨૦૨૬ના વુમેન્સ એશિયા કપમાં ભારતીય ટીમોએ પાકિસ્તાની મંત્રી મોહસીન નકવીના હસ્તે ટ્રોફી સ્વીકારવાનો સ્પષ્ટ ઈનકાર કરી દીધો હતો. ભારતીય ટીમોએ પોડિયમ પર ટ્રોફી લીધા વિના જ જીતની ઉજવણી કરી હતી, જેનાથી નકવીની ભારે નામોશી થઈ હતી. હવે નાગોયાની ફાઈનલમાં પણ આવી સ્થિતિ ન સર્જાય તે માટે નકવીએ અગાઉથી જ ગેરહાજર રહેવાનું મુનાસિબ માન્યું હોય તેમ જણાઈ રહ્યું છે.