નવી દિલ્હી:  નેશનલ હાઇવે ઓથોરિટી ઓફ ઇન્ડિયા એ દેશભરના રાષ્ટ્રીય ધોરીમાર્ગો પર મુસાફરી કરતા લોકો માટે એક અત્યંત રસપ્રદ, ઉપયોગી અને લાભદાયી યોજના શરૂ કરી છે. કેન્દ્રીય માર્ગ પરિવહન અને ધોરીમાર્ગ મંત્રાલય દ્વારા શરૂ કરવામાં આવેલા 'સ્પેશિયલ કેમ્પેઇન 5.0' હેઠળ "ક્લીન ટોઇલેટ પિક્ચર ચેલેન્જ" લોન્ચ કરવામાં આવી છે. આ નવીનતમ અભિયાનનો મુખ્ય ઉદ્દેશ્ય હાઇવે પર સ્થિત શૌચાલયોની સ્વચ્છતાનું સ્તર સુધારવાનો છે, જેમાં સામાન્ય નાગરિકોને પણ ભાગીદાર બનાવવામાં આવ્યા છે. હવે હાઇવે પર મુસાફરી કરતી વખતે જો તમને કોઈ ગંદુ શૌચાલય દેખાય, તો તમે તેની જાણ કરીને તમારા વાહન માટે ₹1,000 નું ફ્રી FASTag રિચાર્જ મેળવી શકો છો.

આ યોજનાનો લાભ લેવા માટે મુસાફરોએ પોતાના મોબાઇલમાં 'હાઇવે ટ્રાવેલ એપ'  નું લેટેસ્ટ વર્ઝન ડાઉનલોડ કરવું પડશે. મુસાફરી દરમિયાન જો NHAI ના અધિકારક્ષેત્ર હેઠળ આવતા ટોલ પ્લાઝા કે અન્ય સ્થળોનું શૌચાલય અસ્વચ્છ જણાય, તો એપ દ્વારા તેનો જીઓ-ટેગ કરેલો  અને સમય દર્શાવતો સ્પષ્ટ ફોટો અપલોડ કરવાનો રહેશે. આ સાથે જ યુઝરે પોતાનું નામ, ચોક્કસ લોકેશન, મોબાઇલ નંબર અને વાહન રજીસ્ટ્રેશન નંબર દાખલ કરવાનો રહેશે. AI સિસ્ટમ અને મેન્યુઅલ વેરિફિકેશન બાદ જો તમારી રજૂઆત સાચી જણાશે, તો તમારા વાહનના FASTag એકાઉન્ટમાં ₹૧,૦૦૦ નું રિચાર્જ કરી આપવામાં આવશે, જે રોકડમાં કન્વર્ટ કરી શકાશે નહીં.

NHAI એ આ ચેલેન્જ માટે કેટલાક મહત્વપૂર્ણ નિયમો અને શરતો પણ જાહેર કરી છે જેથી પારદર્શિતા જળવાઈ રહે. આ યોજના માત્ર NHAI દ્વારા સંચાલિત અને જાળવવામાં આવતા શૌચાલયો પર જ લાગુ થશે, જ્યારે પેટ્રોલ પંપ કે પ્રાઇવેટ હોટેલ/ધાબાના શૌચાલયો આમાં આવરી લેવાશે નહીં. આ ઉપરાંત, એક વાહન રજીસ્ટ્રેશન નંબર પર માત્ર એક જ વાર ઇનામ મળશે અને કોઈ એક સ્થળ માટે દિવસ દરમિયાન આવેલી ફરિયાદોમાંથી માત્ર પ્રથમ સાચી ફરિયાદ જ માન્ય ગણાશે. ડુપ્લિકેટ કે એડિટ કરેલા ફોટા તરત જ રદ કરવામાં આવશે. ૩૧ ઓક્ટોબર, ૨૦૨૫ સુધી ચાલનારા આ અભિયાનથી હાઇવે પર ખાડા પૂરવા, રસ્તાઓનું સુંદરીકરણ અને સ્વચ્છતા સુધારવામાં મોટો વધારો થશે.