હરિયાણા : હરિયાણાના જીંદ જિલ્લામાં નેશનલ હાઈવે પર શનિવારે વહેલી સવારે બનેલા ભયાનક માર્ગ અકસ્માતમાં ખાટૂ શ્યામજીના દર્શન માટે જઈ રહેલા એક પરિવારના ત્રણ સભ્યોના કરુણ મોત નિપજ્યા હતા, જ્યારે બે મહિલાઓ ગંભીર રીતે ઘાયલ થતાં તેમને તાત્કાલિક હોસ્પિટલમાં દાખલ કરવામાં આવી હતી. અકસ્માત બાદ સમગ્ર વિસ્તારમાં શોકનું વાતાવરણ છવાઈ ગયું હતું.

પ્રાથમિક માહિતી મુજબ પરિવાર રાજસ્થાન સ્થિત ખાટૂ શ્યામજીના દર્શન કરવા માટે કારમાં જઈ રહ્યો હતો. મુસાફરી દરમિયાન અચાનક એક કૂતરું કારની સામે આવી જતાં વાહનને નુકસાન પહોંચ્યું હતું. જેના કારણે પરિવારના સભ્યો કારને રસ્તાની બાજુમાં ઊભી રાખીને નુકસાનની તપાસ કરવા માટે નીચે ઉતર્યા હતા.

તે દરમિયાન પાછળથી તેજ ગતિએ આવી રહેલા ટ્રકના ચાલકે વાહન પરનો કાબૂ ગુમાવ્યો હતો અને રસ્તા પર ઉભેલા પરિવારના સભ્યોને જોરદાર ટક્કર મારી હતી. અકસ્માત એટલો ગંભીર હતો કે ત્રણ લોકોના ઘટનાસ્થળે જ મોત નીપજ્યા હતા, જ્યારે બે મહિલાઓ ગંભીર રીતે ઘાયલ થઈ હતી.

અકસ્માતની જાણ થતાં સ્થાનિક લોકો તરત જ બચાવ માટે દોડી આવ્યા હતા અને પોલીસને જાણ કરવામાં આવી હતી. પોલીસ અને રાહત ટીમે ઘટનાસ્થળે પહોંચી ઘાયલોને તાત્કાલિક હોસ્પિટલ ખસેડ્યા હતા, જ્યાં તેમની હાલત ગંભીર હોવાનું જણાવાયું હતું.

પોલીસે મૃતદેહોને પોસ્ટમોર્ટમ માટે મોકલી આપ્યા હતા અને અકસ્માત અંગે ગુનો નોંધી ટ્રકચાલક સામે કાયદેસરની કાર્યવાહી હાથ ધરી હતી. પ્રાથમિક તપાસમાં બેદરકારીપૂર્વક અને તેજ ગતિએ વાહન હંકારી અકસ્માત સર્જાયો હોવાની શક્યતા વ્યક્ત કરવામાં આવી રહી છે. સમગ્ર ઘટનાની વિગતવાર તપાસ પોલીસ દ્વારા ચાલુ છે.