નવી દિલ્હી:આમ આદમી પાર્ટી (AAP) માં સર્જાયેલા મોટા ભંગાણ બાદ રાજકીય ગરમાવો ચરમસીમાએ પહોંચ્યો છે. અરવિંદ કેજરીવાલના ભૂતપૂર્વ સાથી અને હવે ભાજપમાં જોડાયેલા સ્વાતિ માલીવાલે શનિવારે તેમના પૂર્વ બોસ પર અત્યંત આકરા પ્રહારો કર્યા છે. માલીવાલે દાવો કર્યો હતો કે મુખ્યમંત્રી બનતા પહેલા જે વ્યક્તિ ફાટેલા પેન્ટ અને બે રૂપિયાની પેન વાપરતી હતી, તેણે સત્તામાં આવતાની સાથે જ કરોડોના વૈભવી ઠાઠ અપનાવી લીધા છે.

સિદ્ધાંતો સાથે છેતરપિંડી એ જ ખરી ગદ્દારી:

ન્યૂઝ એજન્સી સાથેની વાતચીતમાં સ્વાતિ માલીવાલે જણાવ્યું હતું કે, જો કોઈ સાચું ગદ્દાર હોય તો તે અરવિંદ કેજરીવાલ છે. તેમણે આક્ષેપ કર્યો કે આંદોલન સમયે કેજરીવાલ ખખડધજ કારમાં ફરતા હતા, જે જોઈને દેશના યુવાનો પ્રભાવિત થયા હતા કે આ માણસ પરિવર્તન લાવશે. પરંતુ સત્તા મળતાની સાથે જ તેમણે પોતાના માટે ૧૦૦ કરોડનો આલીશાન બંગલો બનાવ્યો, જેમાં મોંઘા ગાલીચા, લાખોના ફ્રિજ અને લક્ઝુરિયસ સોફા જેવી સુવિધાઓ વસાવવામાં આવી છે. માલીવાલે ઉમેર્યું કે પોતાના મૂળ સિદ્ધાંતો વિરુદ્ધ કામ કરવું એ જ જનતા સાથેની સૌથી મોટી ગદ્દારી છે.

પંજાબને એટીએમની જેમ વાપરવાનો આક્ષેપ:

સ્વાતિ માલીવાલે ભગવંત માનના નેતૃત્વવાળી પંજાબ સરકાર પર પણ નિશાન સાધ્યું હતું. તેમણે ગંભીર આરોપ લગાવ્યો કે કેજરીવાલ પંજાબનો ઉપયોગ 'એટીએમ' તરીકે કરી રહ્યા છે. જે વ્યક્તિએ તેમની સાથે ગેરવર્તણૂક કરી હતી, તેને ઝેડ-પ્લસ સિક્યોરિટી આપીને ભગવંત માનના મુખ્ય સલાહકાર તરીકે નિમવામાં આવ્યા છે. વળી, વીઆઈપી પ્રોટોકોલનો વિરોધ કરનાર કેજરીવાલના કાફલામાં હવે ૫૦થી વધુ કાર હોય છે, જે તેમની કથની અને કરણી વચ્ચેનો તફાવત સ્પષ્ટ કરે છે.

રાજ્યસભાના સાંસદોના બળવા બાદ 'આપ'ને મોટો ફટકો:

નોંધનીય છે કે શુક્રવારે રાઘવ ચઢ્ઢાના નેતૃત્વમાં આમ આદમી પાર્ટીના સાત રાજ્યસભા સભ્યોએ બળવો કરીને ભાજપ સાથે જોડાણ કર્યું હતું. આ જૂથમાં સંદીપ પાઠક, અશોક મિત્તલ અને સ્વાતિ માલીવાલ જેવા દિગ્ગજ નેતાઓ સામેલ છે. અન્ના હજારેના ભ્રષ્ટાચાર વિરોધી આંદોલનમાંથી જન્મેલી પાર્ટી માટે આ એક મોટો આંચકો માનવામાં આવે છે. દિલ્હીમાં પરાજય બાદ હવે કેજરીવાલ પંજાબ તરફ વળ્યા હોવાનું જણાવી માલીવાલે તેમની રાજકીય મહત્વાકાંક્ષા પર આકરા સવાલો ઉભા કર્યા છે.