કૃષ્ણગંજ (પશ્ચિમ બંગાળ) :પશ્ચિમ બંગાળ વિધાનસભા ચૂંટણીના અંતિમ તબક્કાના મતદાન દરમિયાન મેદાનમાં જેટલો ગરમાવો હતો, તેટલો જ વિવાદ બૂથની બહાર પણ જોવા મળ્યો છે. ભારત-બાંગ્લાદેશ સરહદ પાસે આવેલા નાદિયા જિલ્લાના કૃષ્ણગંજમાં એક પોલીસ અધિકારી અને તૃણમૂલ કોંગ્રેસ (TMC) ના કાર્યકર્તા વચ્ચે થયેલી તીખી ઝપાઝપીનો વીડિયો સોશિયલ મીડિયા પર વાયુવેગે વાયરલ થઈ રહ્યો છે. આ વીડિયોમાં પોલીસ અધિકારી અત્યંત આક્રમક અંદાજમાં કાર્યકર્તાને કાયદાનું ભાન કરાવતા જોવા મળે છે.
 આ ઘટના બાણપુર પંચાયતના ગેડે ઉત્તર પારા વિસ્તારની છે. વાયરલ વીડિયોમાં પોલીસ અધિકારી સ્થાનિક TMC નેતાના પતિ ગૌતમ નાથને કડક ચેતવણી આપતા સંભળાય છે કે, “તમારી હિંમત કેવી રીતે થઈ મતદારોને ભડકાવવાની? નિયમ મુજબ તમે ૧૦૦ મીટરના પ્રતિબંધિત દાયરામાં આવી શકો નહીં, છતાં તમે અહીં શું કરી રહ્યા છો?” પોલીસનો આરોપ છે કે ગૌતમ નાથ શંકાસ્પદ દસ્તાવેજો અને પાર્ટીની સામગ્રી સાથે બૂથની અંદર ઘૂસવાનો પ્રયાસ કરી રહ્યા હતા.
 પોલીસ સૂત્રોના જણાવ્યા અનુસાર, ગૌતમ નાથ પાસે રહેલા બેગમાંથી ‘નકલી VVPAT’ ને લગતી સામગ્રી મળી આવવાની આશંકા હતી. જ્યારે પોલીસે તેમના બેગની તપાસ કરવાની કોશિશ કરી, ત્યારે કાર્યકર્તાએ ભારે વિરોધ કર્યો હતો. ગૌતમ નાથનો દાવો હતો કે તેઓ યોગ્ય અંતર રાખીને પોતાનું કામ કરી રહ્યા હતા, પરંતુ પોલીસ અધિકારીએ સ્પષ્ટ કર્યું કે મતદાનના દિવસે રાજકીય પ્રચારની સામગ્રીનું પ્રદર્શન આદર્શ આચારસંહિતાનો ભંગ છે.
 બંગાળમાં ૨૯ એપ્રિલે મતદાન પૂર્ણ થયું છે અને ૪ મેના રોજ પરિણામો જાહેર થવાના છે. આ દરમિયાન ચૂંટણી પંચે સ્પષ્ટ કર્યું છે કે મતદાન કેન્દ્રો પાસે કોઈપણ શંકાસ્પદ પ્રવૃત્તિ ચલાવી લેવામાં આવશે નહીં. કૃષ્ણગંજમાં આ વિવાદ એટલો વધ્યો હતો કે અંતે પોલીસે ધરપકડની ધમકી આપી ત્યારે કાર્યકર્તા ત્યાંથી હટ્યો હતો. ફાલ્ટા અને ભાંગર જેવા વિસ્તારોમાં પણ છૂટીછવાઈ હિંસાના સમાચાર મળ્યા બાદ સમગ્ર રાજ્યમાં સુરક્ષા દળોને એલર્ટ પર રાખવામાં આવ્યા છે.