નવી દિલ્‍હી, તા.૩: લોકસભામાં વિરોધ પક્ષના નેતા અને કોંગ્રેસના નેતા રાહુલ ગાંધીએ દેશભરમાં અન્‍યાય અને અત્‍યાચાર સામે સંઘર્ષ કરી રહેલા લોકોના અવાજને બુલંદ કરવા માટે સત્‍યાગ્રહ નામનું એક નવું ડિજિટલ પ્‍લેટફોર્મ લોન્‍ચ કર્યું છે. મહાત્‍મા ગાંધીની જન્‍મજયંતિના અવસર પર આ વેબસાઇટ શરૂ કરવામાં આવી છે, જેનો મુખ્‍ય હેતુ વિરોધ પ્રદર્શનો અને લોકઆંદોલનોને એકજૂટ કરવાનો છે.

એક વીડિયો સંદેશ જારી કરીને રાહુલ ગાંધીએ જણાવ્‍યું હતું કે શ્રમિકો, વિદ્યાર્થીઓ, ખેડૂતો, આદિવાસીઓ, દલિતો અને મહિલાઓ સહિત દરેક સંઘર્ષની પોતાની એક અલગ કહાની હોય છે, પરંતુ એકલા ઊઠેલા અવાજને ઘણીવાર દબાવી દેવામાં આવે છે. તેમણે દેશભરના નાગરિકોને અપીલ કરી છે કે તેઓ તેમની લડાઈ અને વાર્તાઓ આ પ્‍લેટફોર્મ પર શેર કરે.

જમીનના અધિકારો, મહિલા સુરક્ષા, દલિત-ઓબીસી હકો તેમજ શિક્ષણ અને પરીક્ષાઓને લગતા વિવિધ વિરોધ પ્રદર્શનોને આ પ્‍લેટફોર્મ દ્વારા એક છત્ર હેઠળ લાવવામાં આવશે. રાહુલ ગાંધીએ સ્‍પષ્ટ કર્યું છે કે વિપક્ષના નેતા તરીકે લોકોની આ લડાઈ સંસદમાં, રસ્‍તાઓ પર અને પત્રો લખીને લડવામાં તેઓ દરેક નાગરિકની સાથે ઊભા રહેશે. આ વેબસાઇટના માધ્‍યમથી લોકો પોતાની ઓળખ, પોતાના સ્‍થાનિક મુદ્દાઓ અને અધિકારો માટેના સંઘર્ષમાં નડતા પડકારોની વિગતો સત્તાવાર રીતે રજૂ કરી શકશે.