નવી દિલ્હી:દિલ્હીના ઐતિહાસિક રામલીલા મેદાન ખાતે રવિવારે યોજાનારી કોંગ્રેસ અને વિપક્ષી ઈન્ડિયા ગઠબંધનની વિશાળ મહારેલીને પગલે દિલ્હી પોલીસે અતિ ચુસ્ત અને વ્યાપક સુરક્ષા પ્લાન અમલમાં મૂક્યો છે. આ મેગા રેલીમાં ૧૦ લાખ લોકો હાજરી આપશે તેવો ગઠબંધન દ્વારા દાવો કરાઈ રહ્યો છે, જ્યારે દિલ્હી પોલીસના ગુપ્તચર અહેવાલો મુજબ આશરે ૭૦,૦૦૦ લોકો એકઠા થાય તેવી શક્યતા છે. સ્થિતિની ગંભીરતાને ધ્યાનમાં રાખીને દિલ્હી પોલીસ કમિશનર અનુરાગ કુમાર અને કાયદો-વ્યવસ્થાના વિશેષ કમિશનર દેવેશ ચંદ્ર શ્રીવાસ્તવે પોતે રામલીલા મેદાન પહોંચીને સુરક્ષાની સમીક્ષા કરી અધિકારીઓને જરૂરી સૂચનાઓ આપી હતી.

રેલી દરમિયાન કોઈપણ અનિચ્છનીય ઘટના કે સુરક્ષા ભંગ અટકાવવા માટે સમગ્ર મેદાનને ૧૪ ઝોનમાં વિભાજિત કરવામાં આવ્યું છે અને ૪,૦૦૦ જેટલા પોલીસ કર્મચારીઓ તૈનાત કરાયા છે. પ્રવેશદ્વારો પર મેટલ ડિટેક્ટરથી સઘન તપાસ બાદ જ લોકોને પ્રવેશ આપવામાં આવી રહ્યો છે, જ્યારે વાહન વ્યવહારના સંચાલન માટે ૧૫૦થી વધુ વધારાના ટ્રાફિક પોલીસ જવાનો તૈનાત કરાયા છે. સવારે ૧૦ થી સાંજે ૫ વાગ્યા સુધી ચાલનારા આ કાર્યક્રમમાં દરેક ઝોનની જવાબદારી એસીપી રેન્કના અધિકારીને સોંપાઈ છે, તેમજ ૨૦૦થી વધુ હાઈ-ડેફિનેશન સીસીટીવી કેમેરા, બોડી-વોર્ન કેમેરા અને વિશિષ્ટ કંટ્રોલ રૂમ દ્વારા પળેપળનું મોનિટરિંગ થઈ રહ્યું છે.

આ ઉપરાંત, આયોજકોને શિસ્ત જાળવવા, ઉશ્કેરણીજનક કે સાંપ્રદાયિક સૌહાર્દને ખલેલ પહોંચાડે તેવા ભાષણો ટાળવા અને મેદાનમાં રાત્રિ રોકાણ ન કરવા માટે સ્પષ્ટ આદેશ આપવામાં આવ્યા છે. અચાનક થતા વિરોધ પ્રદર્શનોને પહોંચી વળવા માટે કેન્દ્ર સરકારે સેન્ટ્રલ સશસ્ત્ર પોલીસ દળ (CAPF) ની ૨૭૦ કંપનીઓની તૈનાતી ૧૬ નવેમ્બર સુધી લંબાવી દીધી છે. રમખાણો વિરોધી વાહનો અને સર્વેલન્સ ઉપકરણો સાથે સમગ્ર વિસ્તારને સુરક્ષા છાવણીમાં ફેરવી દેવામાં આવ્યો છે.

આ મહારેલી વિપક્ષી એકતા અને શક્તિ પ્રદર્શનની દ્રષ્ટિએ અત્યંત મહત્વપૂર્ણ માનવામાં આવી રહી છે. સભા પૂર્ણ થયા બાદ ભીડની સુરક્ષિત વાપસી અને ટ્રાફિક સંચાલન માટે પોલીસ તંત્ર સતત હાઈ એલર્ટ પર રહેશે. આગામી દિવસોમાં પણ વિવિધ વિરોધ પ્રદર્શનોની શક્યતાઓને જોતાં પાટનગરમાં સીએપીએફની કંપનીઓની હાજરી સાથે સુરક્ષા વ્યવસ્થા આ જ રીતે કડક રાખવામાં આવશે.