તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
કારમાં નીચે સૂઈને ટાઇગર શ્રોફએ બચાવ્યો જીવ !
મુંબઈના જુહુ વિસ્તારમાં બોલિવૂડ અભિનેતા ટાઇગર શ્રોફની કાર પર થયેલા ગોળીબારની ઘટનામાં ચોંકાવનારી વિગતો સામે આવી : પાતળો છોકરો હતો, પહેલાં લાગ્યું કે ફટાકડા ફોડી રહ્યો છેઃ પરંતુ થોડી જ વારમાં સમજાયું કે ગોળીબાર થઈ રહ્યો છે
મુંબઇ તા.૧૯: રવિવારની સાંજે મુંબઈના જુહુ વિસ્તારમાં બધું સામાન્ય ચાલી રહ્યું હતું. બોલિવૂડ અભિનેતા ટાઇગર શ્રોફ ફૂટબોલ મેચ રમીને પોતાની કારમાં ઘરે પરત ફરી રહ્યો હતો. પરંતુ તેની કાર મુખ્ય રસ્તા પર પહોંચતાં જ અચાનક ગોળીબાર શરૂ થયો હતો. એક પછી એક પાંચ રાઉન્ડ ફાયરિગ થતાં આસપાસના લોકોમાં અફરાતફરી મચી ગઈ હતી. હુમલાખોરો ટાઇગરની કારને નિશાન બનાવી રહ્યા હતા. આ દરમિયાન અભિનેતાએ કારમાં નીચે સૂઈ જઈને પોતાનો જીવ બચાવ્યો હોવાનો પ્રત્યક્ષદર્શીઓએ દાવો કર્યો છે. જોકે, આ હુમલામાં તેનો ડ્રાઇવર ઘાયલ થયો હતો. હવે ઘટનાસ્થળે હાજર લોકોએ સમગ્ર ઘટના કેવી રીતે બની તેની વિગતો જણાવી છે.
ટાઇગર શ્રોફનો ચાહક શાહરૂખ શેખ પણ ઘટના સમયે ત્યાં હાજર હતો. શાહરૂખે જણાવ્યું કે તેને ખબર પડી હતી કે ટાઇગર ફૂટબોલ રમવા આવ્યો છે. તેથી તે અભિનેતા સાથે ફોટો પડાવવા માટે ત્યાં રોકાયો હતો. પરંતુ થોડી જ વારમાં તેની નજર સામે ગોળીબારની ઘટના બની હતી. શાહરૂખ શેખના જણાવ્યા અનુસાર, હુમલાખોરોની સંખ્યા ત્રણ હતી. તેમાંથી એક વ્યક્તિ વાહન ચલાવી રહ્યો હતો, જ્યારે અન્ય બે લોકો ગોળીબાર કરી રહ્યા હતા. હુમલાખોરો પલ્સર બાઇક પર સવાર હોવાનું તેણે જણાવ્યું હતું. શાહરૂખના કહેવા પ્રમાણે, ગોળીબાર થયો ત્યારે ટાઇગર કારમાં ડ્રાઇવરની બાજુએ બેઠો હતો અને હુમલાખોરો એ જ દિશામાં ગોળીઓ ચલાવી રહ્યા હતા. આ ઉપરાંત પ્રત્યક્ષદર્શીઓએ જણાવ્યું કે નજીકના વડાપાંવ સ્ટોલના માલિકે પણ હુમલાખોરોનું વાહન લગભગ અડધા કલાકથી ત્યાં ઊભું હોવાનું જણાવ્યું હતું. આ માહિતી સામે આવતાં હુમલાખોરો અગાઉથી ત્યાં રાહ જોઈ રહ્યા હતા કે કેમ તે અંગે પણ સવાલો ઊભા થયા છે.
પ્રત્યક્ષદર્શીઓના જણાવ્યા અનુસાર, હુમલાખોરોએ પહેલા ટાઇગરની દિશામાં ગોળીબાર કર્યો હતો. ત્યારબાદ કારની સામે ગોળીઓ ચલાવીને તેઓ ઘટનાસ્થળેથી ભાગી ગયા હતા. આ દરમિયાન ટાઇગર કારમાં નીચે સૂઈ ગયો હતો, જેના કારણે તે ગોળી વાગવાથી બચી ગયો હતો. ઘટના સમયે કારમાં કુલ ત્રણ લોકો સવાર હતા. ગોળીબારમાં ડ્રાઇવર ઘાયલ થતાં પાછળની સીટ પર બેઠેલા વ્યક્તિએ તેને મદદ કરી હતી. ત્યારબાદ ટાઇગરે પણ કારને હોસ્પિટલ સુધી લઈ જવામાં મદદ કરી હતી. આ ઘટનામાં ડ્રાઇવરને ઈજા પહોંચી હતી, જ્યારે ટાઇગરને ગોળી વાગી નહોતી.
ઘટના સમયે સલમા શેખ નામની એક વ્લોગર પણ ત્યાં હાજર હતી. તેણે પોતાની નજર સામે બનેલી ઘટનાનું વર્ણન કર્યું હતું. સલમાના જણાવ્યા પ્રમાણે, ટાઇગર શ્રોફ અહીં નિયમિત રીતે ફૂટબોલ રમવા આવે છે અને સામાન્ય રીતે તેની રમત સાંજે ૭ વાગ્યા સુધીમાં પૂરી થાય છે. રવિવારે પણ ટાઇગર ફૂટબોલ રમીને પોતાની કારમાં બેઠો હતો. તેની કાર મુખ્ય રસ્તા પર પહોંચી ત્યારે અચાનક એક છોકરાએ ગોળીબાર શરૂ કર્યો હતો. સલમાએ જણાવ્યું કે ગોળીબાર કરનાર છોકરો પાતળા શરીરનો હતો. સલમાના કહેવા પ્રમાણે, શરૂઆતમાં ત્યાં હાજર લોકોને લાગ્યું હતું કે કોઈ ફટાકડા ફોડી રહ્યું છે. પરંતુ થોડી જ વારમાં સમજાયું કે ગોળીબાર થઈ રહ્યો છે. કાર અટકી ગઈ હતી અને હુમલાખોરોએ ગોળીઓ ચલાવવાનું ચાલુ રાખ્યું હતું. સલમાએ વધુમાં જણાવ્યું કે ગોળીબાર શરૂ થતાં ટાઇગર કારમાં જ નીચે સૂઈ ગયો હતો. તેના કારણે તેને ગોળી વાગી નહોતી. જોકે, ડ્રાઇવરને કોણીના ભાગે ઈજા થઈ હતી અને ગોળી તેની હથેળીમાં વાગી હોવાનું પણ તેણે જણાવ્યું હતું.
ગોળીબારની ઘટના બાદ મહારાષ્ટ્રના નાયબ મુખ્યમંત્રી એકનાથ શિદેએ અભિનેતા ટાઇગર શ્રોફની મુલાકાત લીધી હતી. તેમણે અભિનેતાની તબિયત અંગે પૂછપરછ કરી હતી અને પરિવારને સુરક્ષાની ખાતરી આપી હતી. એકનાથ શિદેએ જણાવ્યું હતું કે ટાઇગર શ્રોફના જમણા હાથ પર ગનપાઉડરને કારણે દાઝવાની ઈજા થઈ હતી. જોકે, તેને ગોળી વાગી નહોતી. તેમણે આ ઘટનાને ગંભીર ગણાવી હતી અને જવાબદાર લોકો સામે કડક કાર્યવાહી કરવાની ખાતરી આપી હતી.
ગોળીબારની ઘટના બાદ મુંબઈ પોલીસ દ્વારા તપાસ શરૂ કરવામાં આવી છે. આ મામલે પૂછપરછ માટે એક વ્યક્તિની અટકાયત કરવામાં આવી હોવાનું સામે આવ્યું છે. પોલીસ સમગ્ર ઘટનાની તપાસ કરી રહી છે. બીજી તરફ, નાયબ મુખ્યમંત્રી એકનાથ શિદેએ સ્પષ્ટ જણાવ્યું હતું કે મુંબઈમાં કોઈને પણ કાયદો અને વ્યવસ્થાની સ્થિતિ બગાડવા દેવામાં આવશે નહીં. તેમણે ટાઇગર શ્રોફ અને તેના પરિવારને સુરક્ષાની ખાતરી આપી હતી. સાથે જ આ ઘટના માટે જવાબદાર લોકો સામે કાર્યવાહી કરવામાં આવશે તેમ જણાવ્યું હતું. આ ઘટનામાં ટાઇગર શ્રોફ ગોળી વાગવાથી બચી ગયો હતો, પરંતુ તેના ડ્રાઇવરને ઈજા પહોંચી હતી. પ્રત્યક્ષદર્શીઓના નિવેદનો બાદ હવે હુમલાખોરોએ આ ઘટનાને કેવી રીતે અંજામ આપ્યો અને હુમલા પાછળનું કારણ શું હતું તે અંગે પોલીસ તપાસ મહત્વની બની છે.
(10:36 AM IST)
છેલ્લા 8 દિવસમાં સૌથી લોકપ્રિય 
