મુંબઈ: બોલિવૂડ અભિનેતા ટાઇગર શ્રોફના નિવાસસ્થાન બહાર થયેલા હાઈ-પ્રોફાઈલ ફાયરિંગ કેસમાં મુંબઈ ક્રાઈમ બ્રાન્ચે મોટી સફળતા મેળવીને ધરપકડ કરાયેલા તમામ ૧૧ આરોપીઓને વિશેષ MCOCA કોર્ટમાં રજૂ કર્યા છે. તપાસ દરમિયાન બહાર આવ્યું છે કે આ સમગ્ર કાવતરું અત્યંત ગુપ્ત અને હાઈ-ટેક પદ્ધતિથી રચવામાં આવ્યું હતું. આરોપીઓ પોતાની ઓળખ છુપાવવા અને પોલીસની નજરથી બચવા માટે 'સિગ્નલ' જેવી એન્ક્રિપ્ટેડ વિદેશી એપ્લિકેશન્સનો ઉપયોગ કરીને જ વાતચીત અને વોઈસ ચેટ કરતા હતા. આ હાઈ-પ્રોફાઈલ ગુનામાં સંગઠિત અંડરવર્લ્ડ કનેક્શન સામે આવતા પોલીસે તમામ સામે કડક MCOCA કાયદા હેઠળ કાર્યવાહી હાથ ધરી છે.

પોલીસ તપાસમાં સનસનાટીભર્યો ખુલાસો થયો છે કે આ ફાયરિંગ પાછળનો મુખ્ય માસ્ટરમાઈન્ડ અને ગુંડાટોળીનો લીડર અનિલ પંડિત છે, જે હાલમાં ફરાર છે. અનિલ પંડિતના સીધા આદેશ અને માર્ગદર્શન હેઠળ જ આ ક્રૂર ઘટનાને અંજામ આપવામાં આવ્યો હતો. ક્રાઈમ બ્રાન્ચે કોર્ટ સમક્ષ રજૂઆત કરી હતી કે હુમલામાં ઉપયોગમાં લેવાયેલા શસ્ત્રોમાંથી એક અત્યાધુનિક વિદેશી બનાવટનું રિવોલ્વર/પિસ્તોલ છે. હથિયારોનો મુખ્ય સ્ત્રોત, સ્થાનિક સ્તરે આરોપીઓને મળેલી મદદ અને નાણાકીય વ્યવહારોના તાર જોડવા માટે તમામ આરોપીઓની આમને-સામને બેસાડીને સઘન પૂછપરછ કરવી જરૂરી હોવાથી ૧૦ દિવસની પોલીસ કસ્ટડીની માંગ કરવામાં આવી છે.

બીજી તરફ, બચાવ પક્ષના વકીલોએ પોલીસ કસ્ટડીનો સખત વિરોધ કરતા દલીલ કરી હતી કે પોલીસે જરૂરી હથિયારો અને તમામ સામગ્રી જપ્ત કરી લીધી છે તેમજ બેંક વ્યવહારોની માહિતી પણ મેળવી શકાય તેમ છે, તેથી કસ્ટડીની જરૂર નથી. સુનાવણી દરમિયાન આરોપી નંબર ૯ (સમીર)ની નાજુક તબીબી સ્થિતિનો મુદ્દો પણ ઉઠાવવામાં આવ્યો હતો, જેમાં રજૂઆત કરાઈ હતી કે તેની માત્ર એક જ કિડની કાર્યરત છે. જોકે, ક્રાઈમ બ્રાન્ચ ડિજિટલ પુરાવાઓ અને મેળવેલી વોઈસ ચેટ સાથે આરોપીઓના અવાજના નમૂના  સરખાવીને આંતરરાષ્ટ્રીય સ્તરના આ કાવતરાના મૂળ સુધી પહોંચવા માટે મક્કમ છે.